تاهت خطاوى الحياه
تاه الطريق
تحس لحظات الأمل
تلقى الحريق
خطوه بتعزب برئ
ينطفى نور العيون
يزداد ظلام
النفوس تنام بحيره
غيره و ألام
دمعة بقلبى الحزين
و آهات أنين
الطنين جوه الودان
المسدودين
الرحمه ضاعت بالمكان
مات الحنين
ضاعت قلوب أتغيروا
و يا اللى كان
شجرة حياه متفرقه
فين الأمان
الضحكه باينه بالوشوش
مرسومه جوع
سهم بضهرك يمنعك
قتل بشروع
الدنيا مليانه حكاوى
و الأخ باع
الأبن باع الوفى
و النبض ضاع
الحب معروض و بنشتريه
و حجر أمى مش لاقيه
الكدبه باينه فى الزمان
متلزقه فى كل البيبان
و الأدين متلونين بارود و موت
و الحزن علم فى البيوت
حريق دمار بركان و نار
الضمير مات فى القرار
متشربه قلوبنا المرار
و لسه مش شايف نهار
صرخه مكتومه طالعه يا دوب
صرخه بتبكى تدمى القلوب
و لسه بحجاره بنحارب بطوب
العيون مبرئه بره الجفون
و الشر باين ضحك بجنون
عيون تبص مستغربه
ساكته شا يفه متقربه
خايفه مرعوشه متكهربه
أصوات بيدبحها السكوت
جدران غزلها العنكبوت
رنين بيدوى بالسراب
و الجسم مردوم بالتراب
يتولد كره و عزاب
و الليل بيندهنا بخوف
من غير كسوف
نرتعش من غير خيال
و الجنون رحله فى بال
الأمل ضايع فى ورطه
و السدود لسه بتوطى
جامده الأسيه
متنهده كل الصدور
النوه لفه
فى البرارى و البحور
الشمس تخدع بالدفى
و البرد قاسى
الأرض نزرعها بشوك
ماشى و حافى
و الجسم ينزف فى المكان
يروى العيدان
زرع مخدوع فى الغيطان
تشبع بطون المحرومين
أجسام نحيفه و دبالانين
عضام طريه مكسحين
أصوات ضعيفه و مهزوزين
شفايف مشلولين مقطوع اللسان
الميه زايده بغدر الطوفان
متعلقين بادين غريق متحيرين
و مافيش طريق
مكسوره العنين متغمضين
السواقى دايره و منساقين
الريق و ناشف عطشانين
و الرجلين متسلسلين
متشرقين متغربين
مشدودين متمزقين
و اللحم مرمى للكلاب
ينهشوا فيه الدياب
غربان و متدربه تخطف تحوم
حيه فى عتمه جايه بسموم
و النياب لسه عطشانه لدم
الطحونه ماشيه بتقطع تلم
سنان متلونه بدم الضحيه
تاكل تضحك قاسيه قويه
ما يهمهاش انك تعيش
تبلعك لحم و ريش
بمكر تكدب تخدعك
تمشى بطريقك تمنعك
القوه سايده بالوجود
و الملك زايل
دايره مقفوله الحدود
الحال و مايل
الرصاص لعبة جنود
ظلم و هوايل
مصنوعه كل الجرايم مترتبه
أجسام بيها الألم متعزبه
و العجله دايره
متكسرة كل التروس
تايه و حايره
تنحنى رقبه و روس
الحكم تايه و القضيه
تدبح مش مستحيه
كل الحقايق متداريه
كلمه بمدفع و بندقيه
الفران تجرى فى جحور
خايفه تواجه أى نور
المشكله بقلبك تقاوم
المساله مافيهاش تساوم
قولها قويه و تكون بحق
جرس الخطر أنذر و دق
الموت نهاية كل فاجر
رب الوجود موجود و قادر
ينكشف خاين و جانى
و الحكايه أحكيها تانى
فيها النصر و الأمانى
و الزمان يكون زمانى
الأمل تشفى الجراح
و الفجر ينده بالصباح
