مـــصــرى...
اللى باع مره الهرم
واللى قال انك صنم
واللى قال شعبك غنم
الجواز بيقول دا مصرى!!!
***
اللى واقف ف الميدان
واللى سهران للاذان
بس سادد الودان
الجواز بيقول دا مصرى!!!
***
اللى طافح بالكلام
واللى قرفان م الكلام
واللى مولود لسه خام
الجواز بيقول دا مصرى!!!
***
اللى يفتى ف أى حاجه
واللى فاهم كُل حاجه
واللى شبعان م السذاجه
الجواز بيقول دا مصرى!!!
***
اللى طهقنا ف حياتنا
واللى حببنا ف مماتنا
واللى هانك واللى هانا
الجواز بيقول دا مصرى!!!
***