لحن حزيـن لحظة .. شروق الشمس من خدك حبات أمل.. بيزغزغوا ف الروح كل البشر يتقربوا منك ونا وحدي فوق رف الزمان مجروح كل الكلام بين ضلفتين الصدر أغنية عصافير تغني موالين للنور ونا جنب منك لحن ما كملشي سطرين ضياع وصراع وناي مكسور... صعب الطريق ف الوحده يا قلبي ونا وأنتِ والـ ... أحزان على السكة كل الطيور ف سماها بتغني والأهه فوق .. طرف اللسان شابكه لسه الجراح متمسكه بيّا لسه الدموع .. جوه العيون سؤالين ليه الطريق رافض خطاويا ..؟ ما زلت عايش ع الأمل يمكن بين غمضتين للعين الشكل يتغير .. وألقى النهار خبط عشان يسكن يرفي الجراح بالنور والحلم يتفسر كل السكك تحدف أغنية من عندك كل الدروب تصبح طريق مفتوح لحظة شروق الشمس من خدك حبات أمل ... يتسرسبوا للروح
