بركان من طين
وحمم جيلاتين
قلبي المشتاق للنار
واقف...
أنا جاي وبصدري العريان
على باب فوهة البركان
فاتح دراعاتي ومش خايف
يمكن جواها أدوب .. أختفي
يمكن على بابي النار تنطفي
لكن تعرفي
أنا جي وفارد جناحيني
وحمم بركان هدف ثابت
لاح أبص شمالي ولا يميني
قلبي المجنون ساحب أيدي
ويا صابت أحاسيسي يا خابت
لازم تفهمي
أنا بره حدود العقل..
أمير ..
أركب جناحات خيالي وأطير
أرسم تصاوير
أغزل من موج البحر قصور
أتمرجح بين اللا معقول
جامع نغماتي في أله واحده
تطلع كروان ...
أو حتى نشاز
مش فارقه خلاص
أحاسيس انصهرت ف أزازه
وولدت أحساس
هو اللي بيعزف نغماتي
هو اللي محرك خطواتي
هو اللي عشانه الكون يختفي
لازم تعرفي
أنا جي وفارد جناحيني
وحمم بركان هدف ثابت
لا ح أبص شمالي ولا يميني
ويا صابت أحاسيسي يا خابت
يعني ح تظلمي..
وألا ح تنصفي ..
م أنا أصلي خلاص
قلبي المجنون
حدد موقفي
