للقلب خندق طين ( بتغَنِّى لمين ولمين يا حمام .. بتغَنِّى لمين ؟ ) للقلب خندق طين وعُفَّاطَة وبُرج حَمَام وانا لمَّا خَش الدم بالطَّلْقَة ما عرِفْتِش .. غير العِيَال والشجر غَنِّيت لُهُم حَطِّت عَلَى كِتفى السويس .. خَرَجْت بيها للميدان .. وطَلَقْتَها تانى دَخَلْت ع الصَف الأخير توْلِد الشَمعة العِيَال على بَعضُهم الريح تخَربِش ف الخَلا وِتْخُشُّهم .. ع الرِّيق تخْنقهم العتمة .. وِتْصُرُّهُم .. عَلَى كِتفى خَرَجْت بيهم للميدان وِطَلَقْتُهم _ تانى رِجْعوا العِيَال .. والسويس .. للصف الأخير والعاصمة داخلة الحصار بخاطرها وانا لمَّا خَش الدم بالطَلْقَة ما عرِفتِش .. غير العِيَال والشَجَر غَنِّيت لُهُم .. ودَخَلْت بيهم ف الحصار زَنَق الخَلا طَرْف الرصيف ف الحيط .. فَعَدّينا يا عَم يا بَنَّا .. هِد العَوَاصِم كُلَّها وابني لنا خندق طين ارسِم لِنا صورة .. م العَتَبَة لتمثال الحريَّة .. الموت بالعَرْض شِد العَرَايِس م الهَدَد .. ع المشْنَقَة زِينَة يا ام العَوَاصِم يا خَاطْيَة .. التُوبة طين وعَجِين غُزِّى فى قلبِك .. قَدَم العِيَال العِيدَان الرُّز واتْحَنِّى بُهُم إتْمَرَّغِى ف الضَىّ لِفِّى البيوت النَىّ سَوِّيها .. وَلا تُخْرجِيش من جِلْدُهُم اللى حَصَدْنَا بَدَارَى .. غَضْبَان عليه الحَطَب فَاتْحَزِّمِى بِينَا وِخُشِّى فى المِحْمَى ع المَطْرَحَة قَلْبِى للقلب خندق طين ع المَطْرَحَة قَلْب إحْدِفِيه يِوْصِل عجين المواسِم بين السَمَا والأرض بالزغاريد خارِج شُعَاع الشمس يِفْتِل ف العجين .. ويلَخْبَط البُلَدَة نازِل عجين الشمس يزرَعْنِى ف مكانى فالسَمَا شاتْيَة .. والأرض خايْنَة لِحين تِخْضَرّْ كُل الجِرِيد ع السُطُوح صاحِى كُل البيوت بِتْهِزَّها رِيحِى تِصْبَح .. حَلْمَانَة خير عَشْمَانة فى موت أخضر ( بتغنى لمين ولمين يا حمام .. بتغنى لمين ) للقَلْب خندق طين وِعُفَّاطَة وبُرج حمام وانا لمَّا خَش الدم بالطَّلْقَة ما عرِفْتِش .. غير العِيَال والشجر غَنِّيت لُهُم .. ( وطنى حبيبى الوطن الأكبر .. )
