سُقُوط  الشارع  الأخير
وِتْصَحْصَح  آخر  باترينة  عَلَى  الناصية
تشِد  الصاج  ..
وتبَحْلَق  ف الخَلْق  بقسوة
_ صَفّين  يا  زباين
يخْتَل  الشارع  ..
تِتْدَارَى  الشمس  من  الباترينة  وتبعِد
عَسْكَر  يِتْسَلِّل  وِسْط  الناس
يِتْسَلِّل  وِسْط  الناس  العَسْكَر
وِسْط  الناس  يِتْسَلِّل  عَسْكَر  ..
تِتْحَوِّل  كُل  المَيَادين  لِحصَار  وكَمَايِن
 
_  صَفّين  يا  زباين
 
وِتْفُوت  الباترينة  ف وِسْط  الناس  الأَسْرَى
صَف  بيدْفَع  دِيَّة _
وصَف  خَلاص  ..
بيمُوت  م الحَسْرَة
_  صَفّين  يا  زباين 

صَفّين  زاحفين  للموت
بيغَنِّى  الصَف  الأول  ..
ويمُوت  الصَف  التانى  بإيد  مَانِيكَان
 (  لو  كانت  عَارْكَة  ..
مِش  كانت  تِبْقَى  المُوتَة  لذيذة  ؟! )
وِتْصِير  الباترينة  غَرِيزَة
أو  سِحْر
وِتْصِير  تَعْوِيذَة
يِزْدَاد  المَوْكِب  رُهْبَان  ..   دَرَاويش
والناس  مُشْتَاقة  تمُوت
مِن  شُبْرَا  لحَدّ  الجِيزة
العِيشَة  تمُوت  ..
ويعيش  الموت  يا  زباين
( تِقْفِل  بَابَك  آمِن  ..يا  تآمِن  )
 
وِتْمُرّ  الباترينة  تعَايِن
مَحْظِيَّات  وِغَنَايِم
وعَبيد  بِيْجُرُّوا  المَوْكِب
وصريخ  ..  مش  بايِن
بيخَطِّى  شارِعنا  الشارع  ..
والعَتمة  بتَاكُل  وِشُّه
الضَىّ  بينزِف  ع الشِبَّاك  ..
والباب  ..
ويمُوت  عَلَى  كَفِّى  ف بِير  السِلِّم
يتْنَهِّد  بِينَا  الشارع
وتخُش  الباترينة  ..
تِحْيِيه  وتقايضُه _
يوَطِّى  الشارع  بِينَا
وتخُش  الباترينة
 
بَصّيت  ف الشارع  على  شىء  مش  مَحْنِى  ..
جَزّيت  على  قلبى  ..
وشَتَمت  الشارع  ..
والعَسْكَر  ..
والبَتَارِين
خَبُّونِى  الناس  وِسْطِيهُم
سِكْتُوا  بشِدَّة  ..
رَفْرَف  عَلَم  الباترينة  ف قلب  شارعنا