سُقُوط الشارع الأخير
وِتْصَحْصَح آخر باترينة عَلَى الناصية
تشِد الصاج ..
وتبَحْلَق ف الخَلْق بقسوة
_ صَفّين يا زباين
يخْتَل الشارع ..
تِتْدَارَى الشمس من الباترينة وتبعِد
عَسْكَر يِتْسَلِّل وِسْط الناس
يِتْسَلِّل وِسْط الناس العَسْكَر
وِسْط الناس يِتْسَلِّل عَسْكَر ..
تِتْحَوِّل كُل المَيَادين لِحصَار وكَمَايِن
_ صَفّين يا زباين
وِتْفُوت الباترينة ف وِسْط الناس الأَسْرَى
صَف بيدْفَع دِيَّة _
وصَف خَلاص ..
بيمُوت م الحَسْرَة
_ صَفّين يا زباين
صَفّين زاحفين للموت
بيغَنِّى الصَف الأول ..
ويمُوت الصَف التانى بإيد مَانِيكَان
( لو كانت عَارْكَة ..
مِش كانت تِبْقَى المُوتَة لذيذة ؟! )
وِتْصِير الباترينة غَرِيزَة
أو سِحْر
وِتْصِير تَعْوِيذَة
يِزْدَاد المَوْكِب رُهْبَان .. دَرَاويش
والناس مُشْتَاقة تمُوت
مِن شُبْرَا لحَدّ الجِيزة
العِيشَة تمُوت ..
ويعيش الموت يا زباين
( تِقْفِل بَابَك آمِن ..يا تآمِن )
بَصّيت ف الشارع على شىء مش مَحْنِى ..
جَزّيت على قلبى ..
وشَتَمت الشارع ..
والعَسْكَر ..
والبَتَارِين
خَبُّونِى الناس وِسْطِيهُم
سِكْتُوا بشِدَّة ..
رَفْرَف عَلَم الباترينة ف قلب شارعنا