توت توت توت توت توت توت مين اللى قايم يوَسَّع ؟ مين اللى هايقول توت ؟ ايه اللى مانعِك تخُشِّى .. قلب السُكات البيوت ؟ القَطْر لِسَّه ما فاتشى .. والسِّكَّة عتمة وسكوت البَرْد راقِد فى قَشِّى بتهِش ريحُه فى عِشِّى واللى يوَطِّى يفُوت لِمِّى سَنابلِك ما عادشى .. فى الجُرن غايب ما عادشى ديلِك فى حَلْقِك ومَشِّى .. هاتى العجين للبيوت اللى يغِشِّك يقُشِّك يعْمِل زَنَاتى فى وِشِّك .. ويرخِى زِنْدُه البارُود واللى يحبِّك يحبِّك .. ويحبِى حتَّى يجيبلِك .. من كُل غالى وعزيز آه .. ده انتى حُبِّك يغيظ واللى يحبِّك يحبِّك .. يمُوت أحلام بتهرَب لوِشِّك هربانة ليه للسكوت مع انى تايه فى شكلِك .. أنا لِسَّه قادِر أشاكلِك ما اعرفش غير بس احبِّك .. واغَنِّى لو حتَّى أمُوت
