إضراب عام ( مرثية من عَنْبَر العِظام ) ما كانش يومُه الجَدَع .. مين اللى جاب داغُه إنْشال يا عينى واترَزَع .. مِيت غُرْزَة فى دماغُه يا سَرَّاقين اسْرَقُوا .. وانا اللى أتْعَوَّر مَحْضَر وهانْطَلْسَقُه .. مجنون ومتهوِّر يا عاقلين صَدَّقُوا .. مُخِّى اتخَبَط نَوَّر وفْهِمْت أصْل الجَلا .. ولا كنت أتْصَوَّر عَقْلِى انْظَبَط وانْجَلا .. كان خُوردة واتْفَوَّر يا فَقْرانين بِالبَلا .. عاملين لى قال بَلْبَلَة .. وانتُم بَلا .. ضَهْر يِسْنِدْكُم وَلا .. ياخُد بإيد الأعْوَر يا بَيَّاعين هِمُّوا وبِيعُوا .. والأرض تِتْبَوَّر طُوزِّين فى وِش العَدُو .. وع العَدُو دَوَّر ما كانش يومُه الجَدَع .. مين اللى جاب داغُه إنْشال يا عينى واتْرَزَع .. مِيت غُرْزَة فى دماغُه