الباشا باشا باشا.....دماغه في البغاشة
بيقعد ع القهاوي......و مايعرفش البشاشة
شايل هموم و ساكت.....و ياريته مايتكلمش
شبورة غيوم و نزلت....كرمشت أحلى وش
*****
و انا جاي ركبت تاكسي.....اديتله 2 حبيه
راح قاللي هات تلاتة.....أنا قلت ليه يا بيه
بتلاتة م البيت للقهوة.....دا كلام ؟دا مش تمام
زمان كانوا يعشوني....بعيالي و المدام
******
بمناسبة المدام....الصبح تقوللي هات
لبس و غسيل و مكوة....و حلاوة و بقوليات
يا ست حسي بيا....دا الهم همي و همك
يا تعيشي معايا ع المر....ياتروحي تباتي عند أمك
*****
و على ذكر العيال....عندي ف البيت كتير
العندي و المكبر....القصير و الطويل
واقفين عليا بخسارة....و ياريت بيطمر فيهم
مع إني بشيل اللقمة....من بقي عشان أعشيهم
******
الشحط كل همه... النت و البنات
و أول مين ينزل....رنات للموبايلات
الواد دا بير هيافة....و طريقه مالوش معالم
بيضيع في حياته طاقة....توصلنا كاس العالم
*****
و الوسطاني أقوله اتعلم....يقوللي هات فلوس
يابني التعليم مجاني....انا حادفع ف الدروس
خلاص يا إبني فكك...م العلم و م التعليم
إنزل العبلك كورة....أو عبي شريط سليم
*****
و ننوس عين امه...مش لاقي حد يلمه
أنا اللي سميته فوزي....و شكلي ف يوم حاسمه
يرجعلي بعد الظهر...و ف وشه حتة نظرة
معاه إنذار أتابيه....كان باطح ست الناظرة
******
دا حتى عم عبده....بتاع محل الفول
بيضرب شعره جل....و معاه محمول بيقول
"أديك تقول ماخدتش....يا ناكر الجميل"
مع إن فوله مسوس....و طعمه مش أصيل
******
الباشا أخوه فريد....شقيان بس سعيد
كابتن كمال أجسام...عضلات و مخ حديد
عنده تلات عيال....طب و هندسة و إعدادي
رباهم زي الكتاب....بمساعدة أم فادي
******
و فادي يبقى مين؟....يبقى أخو إسماعين
طب تعرف إسماعين؟.....ماعرفش إسماعين
إسماعين دا باشمهندس...إنما واد بصحيح
علم و أخلاق و دين....و ف وشه شيء مريح
******
و نرجع نقول دا فادي....طبيب الأطباء
بيشيل هموم الناس...و يساعد الفقراء
أبوه رباه ع الصدق....و إيده فيها الشفا
بصراحة كلام ف سرك....بيطلع صدقات ف الخفا
******
و لو نسينا اللي فات....ازاي حننسى الأم
الليدي جوة البيت.....الملكة اللي بتضم
هي اللي علمت الصغير....يحب المخترعات
و عمره ما يرمي شيء....ف سلة مهملات
********
أديك شفت الباشا....أديك عرفت الكابتن
التاني ماشي ف طريق....و الأول غاوي يركن
حتتعب ياسمك إيه....علشان تدوق بغاشة
تحب أقول يا كابتن....ولا اناديك يا باشا؟!!!
*******
