راحت وأنا من غربتي .. جيت انفض غبار الزمن
أثر الزمن شتّت بقايا .. فرحتي وأغتـالها
جيت أتشفّق علّها .. تعرفني الدار وتحن
وساعة نظرت اطلالها .. أنا رثيت لحالها
يادار وين اللي تربّع .. حبّها القلب وسكن
يادار وين اللي لها .. عيني جرى شلاّلها
يشهد لعيني دمعها .. ويشهد لها حتى الحزن
وذيك النجـوم اللي خذت .. صدر السماء منزالها
لي موطنٍ بعيونها .. والاّ الوطن هذا الوطن
مايكتمل حلو الليالي .. في غياب هلالها
حبيبتي مدهالها .. مابين عيني والجفن
ومن البشر ماغيرها .. حيّ قلط مدهالها
ورحت انشد وجيه الخلايق .. وش قطع حبل الرسن
واسابقي صفراء جفتني .. وأنكرت خيّالها
ياقو قلبي كيف .. ضرّاه الزمان على الفتن
من تحرقه شمس القوايل .. يحتمي بظلالها
نقضت بإيدي جرحي اللي .. داخل القلب اندفن
هجيت من ضيم السنين .. وطحت في غربالها
تالي المسافات الوصول .. وتالي الحي الكفن
تعقدت رووس الحبال .. ويحلها حلاّله