تمثال الحريـــــــــــــــــــــة
 
تمثال غريب وسط الميدان
مبعوت هدية من الجيران
رمز المحبة و الأمان
و حجارته تصرخ من القمار
أتابيها لعبة من الكبار
و يصدقوها ليه الصغار
تمثال و واقف كام سنة
رمز المحبة و الهنا
و الكل عاشق إلا أنا
و يطوفوا حوله مهللين
و مسبحين و مكبرين
يهود و حتى مسلمين
تمثال بيأمر بالسكوت
والدنيا بحر و قلبه حوت
و سمك كتير من الخوف يموت
بينادى بالخير للجميع
و بيشجب الظلم المربع
و الفيتو يضحك على الجميع
بينادى بالحق اللى كان
حرر زمان الأمريكان
و سحابة فوق من زمان
تحجب ما بينى و بينه ليه
و وجوه كتير بتطوف عليه
خليت عينيه اتسمرت
و الدمعة فيها اتحجرت
خلت ايديه
تكتب و تحكى على القضية
اللى ضاعت بيه و بيا
و الناس تطوف
ألوف .... ألوف
جمعت بينها ظروف
اللى صدق كدبته
و اللى فاهم لعبته
و اللى عامل غيته
كل عام لازم يطوف
جايه وياه الألوف
ساذجة أو رغم الأنوف
جمعت بينها ظروف
يا قبلة الصخر العنيد
يا كعبة الشرك الجديد
يا لعبة يلعبها الكبار
و يصدقوها ليه الصغار
الليل حيجى وراه نهار
و حيرفعوا عنك ستار
و حيرفعوا عنك حقيقة
معمول خديعة
لشعوب برئية
و حيرجموك و سط الميدان
و الناس تشوف
ألوف .... ألوف
جمعتها لك ظروف