للشاعرة
اسيرة الابيات.. نورا
مرسومة صورة من ورق شفاف
وفيها بلدى محطوطة ع الغلاف
وجندى صانها .. رجع ترابها ... عمًر قنالها
شايل سلاحه وعمره ماخاف
مرسومة صورة .. مرسومة بلدى
زى العروسة فى ليلة زفاف .....
فى الصورة رسمة على جبينها
وفيها ولدى قايم يغنيلها
غنوة صباح هيجى بكرة ويبنيلها
علم وحياة وينشد مواويلها
ماهو ولدى برضه , شايل فى دمه
كرات الدم من نيلها
مرسومة صورة ,مرسومة بلدى ومعاها ولدى
حالف ليبنى فى شمسها عمره
واحلامها يهديلها ....
والصورة طبعا ياحبيبتى ليكى بالالوان
ازرق واخضر ووردى فيكى كمان
ازرق سماكى فى حضنها تضمنى بحنان
اخضر زروعك بعمرها كبرتنى زمان
ووردى لونك وبحلمها عشت انا انسان
سمعنى واحد قالى اصحى يافنان
دا حلم ولا هيا تخاريف زمان
دا كلام تقوله دا والله عمره ماكان
قلتله لا .. دا عشقى ليها
رسم صورتها بالالوان
وفيها قلبى طاير يغنى
يعزف بحلمه اجمل الالحان
يقول وينشد ...
مرسومة صورة .. مرسومة بلدى
وفيها عمرى اهديهولها كمان
|