كــاس
من لحظة عمرى المتسطر
من دم لدم
من أول صرخه لقلبى المتعثر
من هم لهم...
كنت اعرف إنى هااموت
وانا واقف
على أول آخر درجه
على آخر أول درجه
على درجة أول آخر
ما بتفرقش
كنت أعرف إن الإبداع بيحس
ويلون صوت الانسان والحس
مع إن الصوره بتتكسر
وتروح فتافيت على قولة آه
وإن حلمك منك تاه
اعرف انك بينى وبينك سد
وبإن العمر المتمزع بين ضحك وجد
ضاع على وعد
وبإنك....
على قد ما عشت
دليل فى الضلمه ..........
ُمتّ كفيف
وبإن القلب الدافى فى صدرك
برضك على كـَبرُه .....ضعيف
لكنك مولود فى كتاب
مخلوق متعلق
على صورة إعلان على باب
من ساعة ما وقفت بطولك
وقالولك ..........
من خط العمر المتسّند
على سكة سفرك
اعرف إن عذابك قاطرك
واعرف إن " كفايتك "
خيرك شرك
هيا همومك
سيفك قدرك
واخرس
وإنت تعيش مرتاح
سواح
من بيت الشعر لبيت الراحه
لبيت الأحلاااام..لبراح !!
من عمر الفرحه المتفصل
على قد دموعك
على أول آخر ضحكه بقهر
من حلم (دافنشى)و(فيللى)
و(جيته)و(سقراط)و(صلاح)
سواح
وفؤادك بينزّ جراح
وخيالك أضعف من عامنول
.. لكن .. قبل الجلطه....
نـَوِّلْ شمسك للتايهين فى بيوتهم
وادن غلطه ف مالطه
واصرخ قول الحق
قــُلها بمليون لأ
يمكن صوتك لاخرس
يتحول مره لطلقات
فى بنادق لعبه تشعلل نارك..
أفكارك
يبتدى مشوارك
ويموت على قبرك حوا وآدم
ويموت العالم ..ما لم
يسمع صوت أشعارك
وأنت بتبلع جوع أطفالك
والذل النايم على كتفك
يغرق فى مرارة إصرارك
ويدوق من شعرك
نفس الكاس
ويدوق من شعرك
نفس الكاس .