أنا ولا ّمين ؟!!
                                              إلى الراحل : صديقى

لساك بتحلم وسط خوفك
راضى قلبك بالقليل
لساك جميل
لساك وإحساسك برئ
لساك   كما الفارس جرئ
راكب المهره الغلط
لساكب تنزل للغويط
لساك وحلمك كان عبيط
لساك أصيل
لساك بتحلم زينا بــ (صوت النخيل) ؟
من عمر ما عرفتك وانا
باتمنى اقاسمك صرختك
باتمنى أرد بصوت مشاعرك
ع اللى فكـّر مره يخطف
من عيونك فرحتك
باتمنى   ما انت اللى نوى
يجمعنا حلم يلمنا
نحكيه ونحلم بيه سوا
نرويه
ويكبر ف الهوا
لكن رحلت وسبتنا
وسط الطريق
وتركت فجوه ما سدها
غيرك رفيق
.. وتركتنى لوحدى هنا
شاعر بقالى ميت سنه
عطشان بيحلب سوسنه !!
ولبنها مر
عشمان يحقق حلم حر
طمعان يموت زيك شهيد
وف قلبه سر
ميعرفوش غير ناس قليله
ما يفهموش غير ناس نبيله
قلبهم على قلب بعض
.....................
إستنى لما أبلع فراقك
أودعك
ما أنت الصديق
مش أى حد
ما انت الصديق
اللو نوى يقرب بجد
كان بينا وعد
لكن مجدافى انكسر
لما إنت رحت
وفضلت أنا لوحدى
غريب
مستنى يوم
يمكن تزورنى
وتقوللى مين اختار يموت
ويكمل الحلم ف سكوت
أنا ولا مين ؟!!!!