حدود
مش إنت برضه مننا
وعنيك بتبكى زينا
ولا إنت مش همك علينا
مش برضه غزه زى بيروت
زى بغداد زى سينا
مش برضه جرحنا منا فينا
نستنى إيه مش إنت شايف
أطفال جتتها مقطعه
وحريم إيديها مرفعه
وشيوخ بتبكى ف كل دار
والدم فاض ع الأرض لما
حصل الحلق اللى شقق
من صراخ المظلومين
وشرقنا بيه..
وغرقنا فيه..
وكتبنا ليه
غزه آخر خيط أمل
وهمّ أطفالها جبل
مش هنقدر يوم عليه
دى القضيه...(حاله خاصه)
القضيه فيها أقصى
والنفوس ما عدتش ناقصه
تحتمل دم الضنا
دا اللى ماتوا فى يوم فى غزه
قد اللى بيموتوا ف سنه
كل اللى ماتوا هناك بشر
والدم لوّن مية النيل اللى راكده
لوّن الطوب والشجر
وحياة بواقى النخوه فينا
دمنا ما يروح هدر
وقدرة الله اللى خلى
روح شارون أربع سنين
بيموت حتت
واللى ياما عاث فى سينا
وياما قطع فى الجتت
الأقصى لازم يوم يعود
غصب عن عين اليهود
وكل نقطة دم سالت
من شهيد عدى السدود
وكل دمعه نزفها طفل
يتيم وسالت ع الخدود
وكل أنة أم ثكلى
حلمها الغايب يعود
هيدفعوا قصادها التمن
لو مره وحدنا الحدود
أو مره عدينا الحدود