كأنى لسه مستنى القمر يطلع
وينور لى حياتى معاك
كأنى لسه بتهجى حروف الحب من الاول
وبتعلم
اقول الشعر من الاول
وطيفك فوق جبينى ملاك
كأنى طفل بيدور على طعم الدفا والشوق
وبيلملم فرحته بلقاك
كأنى فى عز عز الضلمه
بتعلق على رموشك كما القنديل
وبغزل من عيونك ضوء
ينور دنيتى بهواك
كأنى بدوق لأول مره طعم الفرحه
وبستطعم سحرها وياك
كأنى بحس بإن قلبى اللى انخطف منى
فى ساعه حظ
بينبض ليك وجواك
كأنى بعوم فى بحر الحب
من تانى
وحاسس انى فيك غرقان
وبتعلق فى قش هواك
