بأمر الحب علمنى ازاى ارسم تقاطيع الفرح بالنور وأفرشها على الخدين علمنى ازاى أمسح تجاعيد الوجع والآه وأمحيها من خطوط وشى وناولنى من معاك منديل أنشف بيه بلل رمشى علمنى وبعدين أمشى جايز فى يوم تنبتلى ملامح فرح ورديه محنيه بغمازتين وقهقهتى تكون عاليه مدويه تصير زلزال كذا ريختر تهز الأرض تحتيه وتخرج صافيه مرويه بترياق السعاده الخام وبالمره دموع الفرح تيجى منين؟ وفين أصلاً مدامعها وفين بتصب؟ وعلمنى كمان الحب بشرط يكون رومانسى ع الطريقه البكر وعرفنى حدود الحيرة فين والفكر لأنى مش بنام بالليل وشيل عنى شوية ويل وخلينى يوم انام سلطان على كفوف الفرح حتى ولو بالكدب والكوسه وهاسمحلك لو تجيب بوسه وعرفنى لما يجى الفرح أعمل ايه؟ وأقابله ازاى؟! وفكرنى ابتسم للجرح وقول للراحه وللاحساس بالاطمئنان حقيقى فات اوان الطرح وخد ايدى تشيل وياك شويه شوق وتنهيده وكام كلمه تبل الريق وصدقنى هاروح وياك فى اى طريق بدون ما اسأل أكيد همك ما هوش أتقل من الهم اللى فوق كتفى ولا الشوك اللى هندوسه معاك أقسى من المخفى فى وريد القلب وقوم يلّا عشان نلحق ميعاد القطر من بدرى ونبدأ رحلة النسيان
