قالوا وقلنا
وقلنا وقالوا

قلنا الحل إن احنا نطنش
كأن الواحد ولا على باله

قلنا حقوق قالوا قانون
قلنا نفوق قالوا جنون
قلنا نعدل قالوا في إيه؟
قلنا في حالنا اللي إحنا عليه
قالوا قولو طلباتكم إيه؟
قلنا العيش
قالوا ريح نفسك
قمح مافيش

طب عايز أسكن

قالوا زايد ورحاب ومدينتي
قلت أنا عايز أعيش في" مدينبي"
قالوا ما هي تعبت زهقت
اطلعوا منها خلاص اتقفلت
قلنا ومين بس اللي خنقها
مين سارق روحها مدروخها
مين قفلها وبهدلها ووسخها
قالو الزحمة
قلنا الرحمة
قالوا طب إبنوا بيوتكو بإيدكو
قلنا ومالو
رحت أنا   أبني وغيري كتير
واقفين والطوابير طوابير
قلت الخير ده بينه كتير
واستنيت أدوار وأدوار
والصبر يا أبويا جبار
ولما أنا جيت أبني وأعلي
لقيت اللي نصحني وقاللي
بلاها بلاهة
وارجع أحسن
لأنت هتبني ولا هتعلي
أمال ايه الموال ده يا سيدنا
ده حكاية وحبالها طويله
دوبها أمر الكبارة
والفاتح درجه أبو نضاره
والكوسة يا معلم غليت
روح ارجع أحسن للحارة
لحسن لما عيارك يفلت
تعلق تشبك في السنارة
ويشدوك هيلا بيلا عالبورش
والباقي عليك فكر فيه
مش هحكيلك لسه عليه

طب نتعلم

ضحكوا وقالوا الله الله
عايز تتعلم يا حلاوة
وهتفهم والروس تتساوى؟
عايز تتنور يا حليلة
وتناطح تعمل هليلة
عايز تزرع
ولا تصنع
ولا تصوت تحت القبة
وتطالب بحقوق لعباد
أو تتبنى آراء شيوعية
وتسيب المجانين في نعيمهم
ولاتقول شي لله يا جيفارا
تتمرد أو تعمل حالة
أو تختارلك   المهاتير
تمشي على دربه وتسير
تعمل تنمية وتطوير
أو تتكلم عن أمجادنا
بجد بحق مش تهليل
أو تفهم دينك وتطبق
ومصيبة ليطلعلك مبدأ
وتفكر وتقلب راسك
إذاي ممكن تعزأ أرضك
إذاي ترجع تمسك فاسك
إذاي قمحك يبقى لناسك
والقطن اللي أبو تيلة طويلة
يرجع من تاني يا حليلة
ولا تحل الأزمة يا سيدنا
وتسد الدين اللي علينا
حقة ساعتها أعملك مولد
والكل على حسابي معزوم
لو تقدر من وسط ده كله
تطلع لي بكلام مفهوم
أو تقدر تبدع أو تكتب
وتقول بئه كل اللي في نفسك
وتحاول تصلح وتعلم
ولا تفوق في المتبلم

أتحداك تلغي الواسطة
أو تقطع للفاسد دابر
إلافي حلم اليقظة شريد
أوتمحي "أنانية" نفسك
أوتنزع روحك من يأسك
مهما حاولت صبرت عاندت
هترجع تاني وبالتأكيد

وممكن برده تبقى عميل
لينا علينا مع   إسرائيل
ولا حرامي خبرة أراري
بتسيب بلدك لأجل القرش
كل كلامك قال وأنا مالي
الله يجازي ولاد القرش

شوف يا بني هجبلك مالآخر
اللي ذاكر ما خلاص ذاكر
حرب وسعد وكامل راحوا
ونشيدنا لحنه درويش
والوطنية والقومية
والوحدة التايهة العربية
قالوا خلاص بخ مافيش

فما تعملش صلاح الدين
عكا اتباعت
وفي خيرها الخاينين عايشين
أما زويل يعقوب والباز
و كل كلامنا عن الإنجاز
فـ ده كله ياغالي
كاموفلاج
قال الباز الصحرا كبيرة
ممكن تبقى جنة خطيرة
بالبحث العلمي المتطور
والعقل العربي المتنور
وزويل قال وزويل ما هوفاهم
المستقبل للي يساهم
مش للي مسفر مش فاهم

وأما تحس إن إنت لوحدك
قوم هتزعأ أو هتنادي
يا أهل آمون بالفرعوني
كفياكو عيشة هميوني
يا كنانة ويا هبة النيل
اصحي وقومي كفاية تغفيل

يا طه ونجيب   وجاهين
يا مصاحبة النغمة عالدواوين
ليه كل ما فيكي بكى وعويل
ليه صوت كروانك حتى أنين

طيب مأنتم أهوه عارفين
أمال عيبنا يا خلق في مين؟
آه عارفين
بس الحال مش بأيدينا
ولا   عارفينه بأيد مين
بس أنا مطعم إحساس
لاتقولي لا تيتانوس ولا خنزير
الفرق ما بينهم فرق كبير

قلنا كرامة

قالو بلا خيبة   بلا ندامة
ده أحنا في قلب الدوامة
لاتقولي لا نخوة ولاشهامة
ولا سينما ومسرح ودراما
فكرك يعني أنا مبسوط
أنا ماشي زيك بالنبوت
مفروس مضغوط مقهور مكبوت
بس كفاية الله لا يسيئك
وبلاها لت   الدساتير
شفافية مساءلة وتشريع
واللي هيلحق يجري يبيع
كله موافق كله بأمره
واللي هيفتح بقه يضيع

قبل طوفان التغيير فلسع
الحق نفسك قبل ما تلسع
أسكت خالص لما أتكلم
واسمع بقه لاجل ما تتعلم
بص لنفسك
إسأل نفسك
مالك ساكت؟
ولا سكاتك حل عجيب
للتهريب والتهليب
ولا لأزمة الأنانبيب

بيب بيب بيب بيب
إحنا أبطال أفريقيا يا عالم
بوصوا وشوف هنعمل إيه

بيب بيب بيب بيب
كله يصرخ كله يهيص
إشهدي ياله علينا يا دنيا
إحنا اللي بدعنا التهجيص

بيب بيب بيب بيب
بس اكتم صوتك يا زعيمنا
لحسن بينه الجاي بوليس
حقه يا أخويا بينه بوليس
يا نهار أبيض
يا نهار كحلي
بس يا عم   أوام نزلني
وإعمل نفسك ولا تعرفني
ولا يقدر في الزحمة يطلني

أنا دبت ودابت أيامي
والهم أنا شايله في أحلامي
أنا راكب فرسي ولجامي
متكتف بقانون سجاني
والدنيا ماهياش سيعاني
مش مالفرحة
من أحزاني لأني بعاني
مالحزن بغني وبنكت
ولا عدت بعاتب ولا اعتت
وأنا مالي بكل الي بيحصل
في الآخر ما أنا هطلع "تيت"

آدي كلامك
داير جوه بنات أفكارك
مش بالذمة طلعت أنا فهمك
أكتر من روحك من نفسك
طب إيه قولك
بعد ده كله؟
لسه بتحلم؟
لسه بتفهم؟
لسه عند ثبات المبدأ؟

بكرة تجيلي
ونرجع مالأول نبدأ
نفس القصة
نفس الغصة في صوتك
وإنت عايز حقك
وأنا برده هعيدلك وهقولك
شوف يا بني هجبلك مالآخر
بلدي دي غالية عليك وعليا
واللي هممني ومجنني
إنك لسه ناوي تغير
بعد ده كله مصر تغير!
والله يمكن
يمكن تقدر
بس ساعتها هكون أنا فين؟
والله أكيد هكون أنا ميت
ابقي إدعيلي
معاك بعدين
وافتكر إني نصحتك
بس لأني أنا شفت في عينك
لمعة
لمعة ذكية ودمعة أبية
بتفكرني بنفسي زمان
لما أنا كنت زمان إنسان

إمشي وروح لاهلك يا بني
طيب وإنت؟

كتر الخوف ما هو نشف دمي
خلاني قاسي خلاني ناسي
انهي في دولة ظلمي عدوي
يالا ما تمشي
إيه مستني؟

أنا مسخ في حواديت أمريكا
وشبح رسموه عالحيطة
ومجرد دمية بتتحرك
بصوابع واعية وحويطة

وزمان كان نفسي أفوق نفسي
وأنصح كل أصحابي وأهلي
ولا أطبق إللي درسته في الميكانيكا
وأنضف   شكمان ضمايرهم
بس هنعمل إيه في مطامعهم

بلا تنمية بلا تجديد
بلا لخمة ولبخة وبولوتيكا
فكك من كام مبدأ فاضي
وماتعملش علينا القاضي
وبلاها حمقة وتشنيجة
ولو مش عجبك
إخبط راسك فـ اتخن حيطة

إقنع وإرضى
وحط الكاتشب عالمستردة
واضرب ويكا
سيب الفكر لناسه بقولك
وأملى دماغك بالمزيكا

إحنا اخترنا الدور الأرضي
بوضع اليد
والوضع المتدني ده نعمة
ومش بيخض
تبت جامد وإمسك فيه

حيلك حيلك بس يا حضرت
حتى الذل عايزني أحبه
وأتبت وأمسك قال أنا فيه؟

ما أحنا في خيره أهوه عايشين
مستر سوكا وميس كمبوكة
بيمنو علينا بملايين
بالمنحة   إللي لولاها يا باشا
كنا فطسنا وكنا فقسنا
وكنا زمنا قتلنا عيالنا!

طيب إقرا عن البلدان
عن مصالحها
عن مذابحها
عن صراعتها
على اللأطيان
عن تسخيرها للغلبان
من أول خلق الإنسان

وسع عينك بس شوية
وإرجع   إقفل عينك تاني
كتر الفرجة وجعلي عينية
ما أنا من يومها مشفتش تاني
دخت شوية لما عرفت
بس أنا فايق أهوه قدامك
ذي الفل
والعيشة أحلى من اللازم
بص وطل
شفت الخلق سعيدة إذاي
ركز حبة جوا الكدر
صور مصر في عز الفجر
شفت الدنيا جميلة   إذاي

إنت مبالغ والله كتير
وعايزلك حبة تخدير
عايز تاكل قمح بخيره؟
عايز عيش من غير مسامير؟!!!!
عايز تسكن كده ببلاش؟
لأ وبكيفك بلا تهجير!
عايز بحث وعلم وخبرة
وعقول ناضجة وفاهمة وعارفة
وقلوب صافية
ده حلم جميل

إصحى يا حلو
يا عم يوتوبيا
وتعالى
أنا عازمك على لوبيا
ولا تفضل تاكل بامية
خلي الجودة بالموجودة
واسكت ثانية
اتأمل دنيا
غير الدنيا
وقول يا كريم!