الدنيا ست كبيرة ولابسة نظارة
ساكنة لوحدها فوق سطح عمارة
لابسة بالطو قديم وف بقها سيجارة
تاخد نفس تحبسه وتطلعه بحرارة
بتقوللي اوعى تبيع الغالي بخسارة
وتجيب رخيص وتقوللي دي شطارة
وشغلك تمللي يبقى من ورا ستارة
دي اكبر نار كان اصلها شرارة
والحب لو كبير اوله إشارة
والهرم لو عالي برده اصله حجارة
ووالله زمان بتقولها بمرارة
*********
الدنيا دي مدرسة وفيها نتعلم
وبأعلى صوت وفي السر نتكلم
ولو يوم تعيد الدرس من تاني
بإيه يفيد اللي طول عمره مبلم
********
اسمع كلام م الدنيا غيره مفيش
يابن ادم فعلك كله طيش
بامر ربك في الارض عيش
ولو يوم ينتهي عمرك
تبقى الدنيا بعدك ما تنتهيش
********
لو بتحب الحياة
تبقى فاهمها غلط
عمال تقول في كلام
كله عبط في عبط
الدنيا يابني للسباع والنمور
والفتات يبقى للكلاب والقطط
ولو ميزان الدنيا يوم انظبط
تلقى العيال بيحدفوك بالظلط
*******