فى يوم عيدك يا أغلى الناس بهاديكى
وأى هدية يا أمى تليق بيكى
وأى كلام حيوصف حبى ياغالية
قصايد الدنيا يا أمى متكفيكى
¤¤¤¤¤¤¤
يابسمة عمرى فى سفرى وترحالى
يا أجمل صورة دايما تيجى على بالى
بتقسى الدنيا يا أمى ومابتقسيش
وحتى لو إنت مش راضية على حالى
¤¤¤¤¤¤¤¤
يا نبع من الحنان مليان على الآخر
ياقلب شال الهم صبره مالوش آخر
ياسلسبيل الخير ويا نبض كل حياه
طالب النجاه والرضا والصفح فى الآخر
¤¤¤¤¤¤¤
لا كان من طبعك القسوة ولا هيكون
وكيف يقسى فؤاد أصلا بطبعه حنون
على حسك بعيش فى الدنيا ياغالية
ويوصلنى دعاكى يا أمى فين مابكون
¤¤¤¤¤¤¤
أنا الطامع فى جنة تحت أقدامك
أنا الطامع أكون طول عمرى خدامك
أنا الطامع أكون لك زى ما كنتى
شعاع من نور ينور كل أيامك
