أرض طِيبه يا طيبه ...
يا مىّ .. يا غاليه ... يا حنيَّنه
انتِ الأمان ... كلّلك حنان ...
و مهما أغَرب و أبعِد بعيد ...
لكن أكيد ... أرجع أكيد
حبَّك ده بوصله ... فى قلبى دليل
و مهما طالت بيا السنين ...
أرجع أكيد .
أضحك ... أعيَّط ... فى صوتى أنين
مهو مش بخطرى ... دى غربة سنين
الغربه مرَّه ... و ليلها طويل ...
لكن فى قلبى جــــــــــــــوه دليل ...
أرجع أكيد ...
أرجع لخيرك ... و اتحنَّى من طينِك
أتعطَّر بماء نيلك ... و كحَّل عيونى بليلِك
أحضن تراب ارضِك ... و ارمى همّى فى صدرِك
على كتفِك ... أحطّ راسى و انام ...
أنام ... انام من غير كلام ...
ما هوه ده الأمان
و فى غربتى كنِتى ... تمدّى ايدك فى المنام ...
تتحسَسى شَعرى ... لجل ما انام ...
و انسى الآلام
أرض طيبه يا طيبه ...
يا مىّ ... يا غاليه ... يا حنيَّنه