بقايا روح عصفوره
شعر: العنود سعود

رحلت ومابقي بعدك سوي ذكري بهالصوره
ملامح وجهك المرهف بقايا بسمه احساسك

ونظرات الوله والشوق وضحكه حيل مسروره
بقت مرسومه في وجهك وتضوي بين ألماسك

إلين اليوم اشم عطرك بقايا المسك وشعوره
أ ياللي ريحتك إحساس تدفق بين انفاسك

ياطعم ولون يا إنتُْ ياشكل ومعني بحضوره
أحس اني معك أحلم ألم إيدك أشم راسك

وأتظلل وسط قلبك بقايا روح عصفوره
يطيرها الوله تشتاق رحيق الوجد من كاسك

أنا للحين صدقني مع الأحلام مأسوره
أخذني الحلم لدروبك وطيرني من نعاسك

رجيتك غمض اعيونك انا حلمانه معذوره
أدور في هدب عينك ألملم ضي نبراسك

وأتشرب غلاك اكثر وأغرف صافي بحوره
ولو يغرق معك قلبي أسير الشوق غطاسك

بجدف بالصبر وابقي مع الأمواج منثوره
عشقت البحر من قبلك وأثر الملح بقياسك

وإنت الملح لو تدري ورحيق الورد بعطوره
أ ياللي من غلاك اكثر هويت اهلك أنا وناسك

هويت الطهر بترابك يانبت الخير وجذوره
تجي انقي من الغيمه وتروح بطيب نسناسك

أنا للحين صدقني إلين اليوم مبهوره
أذاكر نبره حروفك واراجع نبض قرطاسك

أبي أقراك بعيوني بكل نظره مع الصوره
واعيد اللحظه باحساسي وأشرب باقي احساسك