أحبك أكثر شعر: العنود سعود أحبك أكثر من كلامن أقوله واكثر من احساسن بصدري كتمته وصف المشاعر مايجي بالسهوله الشعر قاصر لو بدمي نظمته ناظر عيوني من غرامك خجوله يبان فيها الشوق مهما لجمته واقرى كلام القلب واعرف ميوله إن كنت شاطر بالمحبه فهمته شيٍ خفيته واحسب اني بنوله والحظ قصر بالعطايا ولمته وشيٍ ظهر لك غصبْ روحي عجوله توله عليك وعلة الشوق صمته البعد قاسي والمسافه عذوله والوصل ضايع واللقا انفطمته رجعتني لاحساس وقت الطفوله وذكرتني بالعمر واللي انحرمته أسخف حلم نفسي بليله أطوله أحلم متى أكبر وحلمي رسمته خطيت باوراقي معالم فصوله لونت إحساسي وضعفي هزمته وكبرت من همي أجرجر ذيوله ياليتني ماعشت ليله وحلمته صحيتني واحييت روحي الكسوله ضميت قلبي وبحنانك رحمته وارويت عودٍ جف طوَّل ذبوله عاد الأمل والياس مات وعدمته يفداك مال وروح واهل وحموله واللي بقى قلبي بحبك حكمته واكثر من اللي لك أقوله وتقوله أحبك أكثر والغلا بك ختمته
