اى دمعه حزن

للشاعر / محمد حمزه


.

أي دمعة حزن
لا لا لا لا
أي جرح في قلبي
لا لا لا لا
أي لحظة حيرة لا
لا لا لا لا لا
حتى نار الغيرة لا
لا لا لا لا
عايشين سنين أحلام
دايبين في أحلى كلام
لا عرفنا لحظة ندم
ولا خوف من الأيام
قلبي دق دق دق
قلت مين عالبيبان دق
قاللي إفتح دة الزمان
قلتله يا قلبي لأ
جاي ليه يا زمان
بعد إيه يا زمان
بعد إيه يا زمان
من كام سنة قلبي و أنا
عايشين هنا
من كام سنة
من كام سنة دنيا الهنا
بتضمنا من كام سنة
وقال إيه جاي الزمان يداوينا
من إيه جاي يا زمان تداوينا
دة الأمل في عنينا
والفرح حوالينا
سأل الزمان و قال
إيه غير الأحوال
قلناله حبينا
وارتاحنا و نسينا
وارتاحنا و نسينا
دة احنا حبينا
و ارتاحنا و نسينا
الجرح بتاع زمان


إحنا إحنا إحنا
اللي أمنا للزمان إحنا
و إحنا إحنا
إحنا اللي
خد منا الأمان و جرحنا
إحنا إحنا
اللي طاوعناه إحنا
وعمره في يوم
ما ريحنا
ولا ملامة علينا لا ملامة
داحنا تعبنا و دوبنا ياما
واما ندينا عليه يداوينا
عمره ما فكر في يوم يجينا
وأدينا عايشين
وبقينا عاشقين
لا جراح بقلوب
و لادمع حزين
ولما دق الحب بابنا
الربيع نور شبابنا
وقال إيه جاي الزمان يداوينا
من إيه جاي يا زمان تداوينا
دة الأمل في عنينا
والفرح حوالينا
سأل الزمان و قال
إيه غير الأحوال
قلناله حبينا
وارتاحنا و نسينا
الجرح بتاع زمان


وفي ليلة مش ناسيها
سهران الفرح فيها
جالي الزمان و معاه
هدية فرحت بيها
حبيبي الأولاني
سافرت كتير معاه
كتير كتير معاه
بأحلامي في هواه
كتير كتير معاه
سقيته من حناني
وبنيت معاه أماني
وقلت ياريت يا دنيا
تديني عمر تاني
وصحيت على العذاب
لقيت الفرح غاب
والحب يا عيني داب
أتاري الزمن كداب
وقدرت يازمان
في رحلة النسيان
أنسى اللي كان و أرتاح
وأبعد عن الأحزان
شوف يا قلبي شوف
شوف الدنيا ياقلبي
حلوة حلوة إزاي بالحب
عمرك شفت قمر سهران
غير للعشاق
والا نجمة جايبة كلام
غير للمشتاق
كل العاشقين زينا عايشين
لا جراح في قلوب
ولا دمع حزين
وقال إيه جاي الزمان يداوينا
من إيه جاي يا زمان تداوينا
دة الأمل في عنينا
والفرح حوالينا
سأل الزمان و قال
إيه غير الأحوال
قلناله حبينا
وارتاحنا و نسينا
الجرح بتاع زمان

...

..