ليه خايفين؟؟

 

أسألي نفسك .. ليه خايفين ..

ونكران ريدنا .. حيقنع مين ..؟

ومافي ملامة من الحاسنه ..

ومن إحساسنا حنهرب وين ..؟

           ***

عندك شك ..

في إنو البينا

شعور تلقائي .. صريح .. وأمين ..

وليه الخوف

 من شئ جوانا

مسيطر وغالب ويملا العين

ولو سمينا البينا

صداقة

حنفقد أخص رباط وحنين

ولو سمينا البينا

 محبة

نخالف شرع الملتزمين

ولو خلينا

بدون يتسمى

حنفضل وسط الموج لاجين

خوفنا

 نخالف ناموس غيرنا

هو الخلانا دوام تايهين

ليه ما نحسه ..

نقوله .. نعيشه

ونلبسه حلية وطوق ياسمين

***

وأسألي نفسك ليه خايفين ..؟

وندفن

 راس الحق في الرملة

وعمدا عن الريد ساكتين

ونشهر سيف الخوف

على روحنا

وريدنا مسالم ونايه حنين ..

قدرك خدرك ..

وخوفك حذرك

من تجريب البينا يقين

وفوق

شماعة القدر الوردي

نعلق توب أخطانا سنين

          ***

ما تتأخري ..

ركب الفرحة

زافي الحبوا وما خايفين

والاتحننوا

بى آمالهم

والاتجرتقوا .. منشرحين ..

وليه نتخاذل ..

ونحن الأولى

نقود الموكب .. متفائلين

***

يا حلمانه

وليلك صاحي

أحلمي .. أحلمي .. زيك مين !؟

قبل الليل

ما يبوح فجره

وتصحى عيون المكفوفين

أحلمي ..

يطرح حلمك منية

تكفي العالم سلوى وزين

تخرجي حلمك

من الراجل

 ومن العازل

ومن الحاسد وشر العين ..

            ***

عشنا الماضي ..

حلاوته ومره

وكله ترقب ومنتظرين ..

الأيام الحبلى

 وجايبه

يا يوم باكر فجرك وين

والبيناتنا

الأعلن جيته

كان في رحم الماضي جنين

ولما يجينا

الطفل الضاحك

كده نتوارى ومكسوفين..

         ***

 

يا مشدوده

بحبل المهلة

فكي وثاق المأسورين

ويا موعودة

وهبت ريحك

يلا اغتنمي صلاحها الحين

ولمن اوفت

ليلة قدرك

لملمي يلّا شتات البين