قرار إزالة
 
الجسم هزيل ...
وسنين العمر المحشورة
في حواري الروح
مع كل تراب أرض الأوضة
عاملة التطبيع ..
أمبارح بس ...
الركن الضلمة اللي سايعني
مبقاش بيسيع ..
وباحس الكون بيضيق بيّا
القلب ال تعود يضحك
دلوقتي حزين ...
ونا شايف جسمي المتكوم
على شكل جنين
والعين بتلف مع الساعة
وتزك مع العقرب لحمر
والضغط الواطي اللي تاعبني
وبقاله سنين
مع كل دبيب خطوة تعدي
يوصل لمتين ... !!
القلم المتعود يمضي
قرارات وخلاص
منزوع من بين قلبه الأحساس
وأنا كل ما افكر إيه حيكون
وأزاي راح أعيش من غير جدران
ف الساعة أموت ستين مرة
أطلع بره ...!
م أنا ليّا سنين طالع بره
الشق اللي أتعود يوسع
لسه بيوسع ...
لكن أنا راضي بنفس الحال
ومدام السقف بيحميني
من طل الليل ...
ح أفضل راضي ...
الرعب اللي بييجي يزورني
مع كل نهار ...
على باب الدار ...
واقف بيقول لم عزالك
مش وقت عزال ...
م أنا كل عزالي يدوب هدمه
وملاية وكيس عامله مخدة
لكن أنا فين ..؟
وح أروح على فين ..؟
على أي رصيف أنا ممكن أنام
وأحلم .. وأعيش
ويقولوا عليّا الناس درويش
لكن مين يضمن يوم ميجيش
القلم المقتول الأحساس
وأنا نايم ساعة قيالة
والحالة كما نفس الحالة
بقرار بيقول ....
                    برده أزالة