لونه الهوى اصبح ذنب ذنبي وگعت بحبكم
و معذور ويظل الگلب لن ماكو ابد مثلكم
منكم الزينه تفرگت و الشينه ما مرت بكم
و حگ العرب لو فاخرت اهل الارض بامجادكم
ليت البسيطة تنملي ناس التجيد افعالكم
جان الظلم ولّى و غدى و حلّت محلّه اخلاگكم
الليث بالغاب ارتجف خايف يمرّه سيفكم
عيون الصگر ما شالها لنّه استحى من عيونكم

الزين و يزينه العگل و فوگه الثگل يبرى لكم
و شمس الضحى حين اشرگت غطّت بنوره جبينكم
يا شجره فيّت و ازهرت خلّوني ساعة بفيّكم
ارتاح من طول العنا و اروي الضما من نبعكم
لساني لو گوله مدح لا ما يوفّي حگكم
لا ارض توسع لا بحر لو ردت اعدّ اخصالكم
لون الحبر گدّ الثرى و الكتب كم توسع و كم
ما ظنّتي توسع حكي   و شعراً نظمته بحبكم
يا سهيل و بجبد السما ما هگوتي اوصل لكم
و اتمنّى لو لحظة حظى و انعم اكّليبي بودكم
ادعيه و لرب العرش كون بهواي يصيبكم
و ان ما تحگگ هالحلم يكفيني مرّة طيفكم