سرقت دقيقة

سرقت دقيقة من سلة الساعات
وجريت استخبى
وف حضن شجره ربيعها فات
سرحت حبه حبه
غرق السكون حواليا
نعس النهار
ف عينيا
وهمست اسمك
لمس السكات خصلة هوا
ولقيتنى أسرك
حضن الهوا صوت شأشأة
ورسمت سيرتك فوق الخضار غرقان ندى
وف وسط موجة دندنه
وف كل أسمر عوده بيفكرنى بيك
طينه وترابه
وأرضه بياخدنى ليك
وبعد وصلة حنين طويله
همست ف ودنى الدقيقه
"لازم وحالا نرجع لسلة الساعات
وننسى حضن الشجره
وربيعها اللى فات"
سبت اسمك ورسمك
وسيرتك
وجريت ألاحق روحى
وحيرتى وضعف خوفى
لقيت دقيقتى ف قلبى
وف سلة ساعات
وحاولت أستخبى
من كل الشجر
واللى فات..
حبه حبه