رباعيات

ارسم هواك مشنقه
واحلم بيوم اللقا
دى الرقبه   بين حبلين
ارحم كتير م الشقا
....
ارسم بإيدك علم
على نص متر قماش
لو حتى كان بالألم
دا مافيش وطن ببلاش
....
ارسم بحزنك نجوم
بتغنى فى الحفلات
ترقص عرايا الجسد
والأمه ماسكه صاجات
....
ارسم بدم الشهيد
على كل حبة رمل
فارس وجاى م الصعيد
همه يلم الشمل
....
ارسم بصوتك زعيم
ويكون له أب شهيد
ح تلاقى تاره ف عينيه
واحنا لناره وقيد
….
ارسم ب حر الكلام
ع السجن ف ابوغريب
مادام خانوك العرب
فاللى حصل مش عيب
....
ارسم ملوك بتعيش
على نص قرش حشيش
وارسم شعوب بتموت
علشان تلاقى العيش
....
وارسم فى مصر عروسه
وتكون جميلة الجسد
اعملها ليك   تعويذه
واحرقها خوف م الحسد
….
وارسمنا كالتماثيل
من عهد حتشبسوت
وارسمنا نهر النيل
اللى عشانه نموت
....
وارسمنا شجرة توت
وارسمنا شعب نضال
مبدأنا لو ح نموت
مش كل صقر جمال