لو كنت يوم مكانى
و حالك هوه حالى
حتشوف بشكل تانى
غير اللى بدا لى
فكر يا حلو حبة
بعدين جاوب سؤالى
ا
*******
يعنى لو كنت حاكم
مش حيميل الميزان
لكفة أى ظالم
استعبد الانسان
و لو كان الابن الغالى؟!
فكر يا حلو حبة
بعدين جاوب سؤالى
و ان ايدك مرة تطمع
فى أموال الخلايق
حتقول للقاضى اقطع
و تركع للِّى خالق
مهما عليت فى العلالى؟!
فكر يا حلو حبة
بعدين جاوب سؤالى
حتسمح للَّى خالف
يبدُر فكرة معارضة
تطرح مليون مناكف
يقلع جدور السلطة
و ترجع انت خالى؟!
فكر يا حلو حبه
بعدين جاوب سؤالى
*******
و لو اتولدت قبطى
فى بلاد المسلمين
حتكون بالوصف مرضى
ولاَّ بتلعن سنين
غيرت حالك و حالى؟!
فكر يا حلو حبة
بعدين جاوب سؤالى
حتعذر اللى كاره
و تغفر للَّى كفّر
و تواجه المكاره
تستسهل لو تغير
والدين ما يبقى غالى ؟!
فكر يا حلو حبة
بعدين جاوب سؤالى
حتعيش سعيد معايا
و انت فى دنيا لواحدك
و تقول عداك عدايا
وتجرى فاتح سِدرك
تاخد الرصاص بدالى؟!
فكر يا حلو حبة
بعدين جاوب سؤالى
******
و لو كنت فى امتحان
و الكل فى بيغش
ترضى تكون خسران
والكل ناوى يقش
تقدر تفضل مثالى ؟!
فكر يا حلو حبة
بعدين جاوب سؤالى
***
و لو مسجون يا حر
فى شىء اسمه وطن
و كل يوم بيمر
تتباع من غير تمن
مش راح تبيع الغالى ؟!
فكر يا حلو حبة
بعدين جاوب سؤالى