قالولي بتحب مصر فقلت وليه محبهاش
لا أذتنا في يوم ولا ضرتنا ولا من نيلها مشربناش
هل يوم طلبنا منها وحرمتنا ولا ادتناش
وهل يوم قسي علينا قلبها وبحنيتو محسناش
دي اللي أرضها من كل مكان انسان عاش
سألوني بتحب مصر قلت وليه محبهاش

انا اللي حفيت علي أرضها ويا العيال في الحارة
وكنا عيال قرود فاكرين النصب شطارة
واتعلمت فيها ازاي اسند اخويا وازاي اساعد جارة
ولم بامشي في الشوارع والحواري والميادين
وابص عالناس حواليا في كل حتة، شمال ويمين
باحس فكل واحد منهم شاعر ولا أديب من الأقدمين
واحد يلاعب عوده كما السنباطي عزف
والتاني يرمي همومه في كلمة وغنا
وتالت يشتكي يقول ليه مش عايشين في ترف
واللي اشتكي يقول انا عايز اهج بعيد
كفاية بقي فقر وبهدلة وتهديد
يهج ويروح ويجي ويقضيها تنطيط
ويبهدلوه الغرب ويمسحوه البلاط والحيط
أو تتفتحله طاقة القدر ويبقي من اصحاب الفلوس
يا اما طيب وابن حلال يا اما علي رقاب البني آدمين يدوس
وفي الحالتين اجابة واحدة: وحشتني مصر أكيد.

سألوني بتحب مصر قلت وليه محبهاش
خطي فيها برجليه عمرو بن العاص
وجال في قراها ومدنها ويا الناس
وكان قدومه فاتحة خير وسلام علي مصر
وطلع منها بالجيوش الأيوبي
ومنها قال المظفر كلمة تتحكي في كل عصر
وبيبرس وبن طولون وكتير عايشين
عايشين باسم وتاريخ . . . فليه محبهاش

مش كنت أنا بروح لنيلها
اشتكيلو هم واحكيلو علي فقلبي
ويسمعني وياخد ويدي في الكلام
وفي أخرت المتمة يشيل عني بعض همي
ولو غلطان يديني شوية نصايح وملام
وزرع غيطان انا ياما جريت حواليه
وياما لعبت مع ولاد الخال والصحبة فيه
ولا أهلي الناس الأصيلة الطيبين
ناس تعبت عشاني . . .وانا عارف اني مدين
ولما رجعوا وسألوني بتحب مصر
قلت وليه محبهاش دي ست كل عصر

صحيح في فقر وغلا وبلاوي زرقا
لكن مش هي السبب دي زينا غرقي
لا تلوموها ولا تزودوا همها بهموم
ولا واحد يقول: فقرتينا وضيعتينا
ولا يشتكي: بقي عندي العيال بالكوم
والمصايب من كل شكل ولون
بدل ما نرميها ما تيجي نصاحبها
ولا نآخيها ولا نجاورها
ونغير أحمد ومحمود وسعيد من جوه
يمكن . . يمكن هي مستنية منا مبادرة
عشان تفتح لنا حضنها ودراعتنا
وتقول: انتو اللي تستحقوا تعيشوا فيا
انتو اللي اقدر استأمنك عليا
وبتسألوني بحب مصر . . طبعا بحب مصر