وأما الصبح لاقيت شباكك
على غير العاده و مقفول
ولا بتنادي عيال الشارع
ولا بتناكفي بتاع الفول
أتمشيت قدام شباكك واتنحنحت
يمكن تسمعي صوت رجليا
تعرفي إني واقف تحت
تطلبي مني أودي و أجيب
ولا أزايز املاهالك
و تزعقي فيا أما أغيب
وأنا أسيبك تعملي مابدالك
و تنادي لعبد التواب
و أما يجيلك كده يتلكع
تلعني خاشه في كل كتاب
و يقول لك لولا ست كبيره
و تقولي ياض أنا لسه شباب
والله شبابك كان في زمانك
ما تبقاش غير منه لسانك
يشتكوا مر الشكوى جيرانك
و أما تغيبي طابور ع الباب
و أما تنادي لواد م السكه
و تطلعي من صدرك فكه
و قال إيه فاكره انها بتجيب
عايشه بخيرك في زمن سكه
فيه الجيب عمال بيخيب
فاكر لما خناقتك يوم
كانت مع بياع الثوم
لما وزنلك روس بعروشها
و تصرخي حوشها ما تلزمنيش
و أما يرخص ليكي في ثمنه
تقولي حسابك لما نعيش
اللبان و البقال و الخضري
و على بتاع العيش
كله بيخرج منك ينفخ
و لا يستجرى في يوم ما يجيش
يا أم العربي وقفتي طالت
يا أم العربي أفتحي شباكك
صحي الشارع
من غير حسك والله الشارع
شكله يتيم
رد البكا من ورا شباكها
قال لي دي قابله رب كريم