------------
يا بلاد
الضحك ليه
فيكي أزمه
هقهقه
والعيون الناعسه
ليه
  مستغربه
و مبرقه
يا بلاد
الضحك قومي
يلا قولي
النكته فين
اللي كانت
ليها لزمه
  اليوم دة
ليها لزمتين
كان زمان
الضحك كومه
في كل قاعده
و كل قومه
نعبي منه  
بدون حدود
انتي ايه
استخسرتي فينا
ولا دي  
ازمه خدود
متشبعه  
بدموع شقا
واللي بقا
كام خط
شداه السنين
من ناحيه
ماسكه مقرطه
و ناحيه ترخي
برختين
و اما تميل
علي جانبنا
تضحك لنا
تاخد كتير
من عمرنا
يادوب
ترش الرشتين
تطلع عليهم
شمس طوبه
الاروبه
ينشفو
قبل ما يبلو
الجبين
و سنين سنين
متحملين
يا دي الخدود
سلخ الجلود
و بين تلاشي
و بين وجود
تمر بيكي
من الوعود
اللي بيحفظو
ليكي الامل
ان ضحكك
جاي اكيد
بس راكب
فوق جمل
و المحتمل
إنه تاه
تاه ما حد التقاه
تاه وسط الزحام
و لأن اصله
ماده خام
مر بمراحل تنقيه
من كام و خمسين سنه
يكسروه
من كام و ثلاثين سنه
يطحنوه
من كام و عشرين سنه
يعصروه
لكنه لسه خام