أنا الفلكى
أشوف البرج للملكى
وللميرى
واراعى الكلمه
وضميرى
- الحمل -
ونقسم فيما بيننا رغيف
ونتشتت
بيوت ورصيف
ونتعاهد على الغربه
فنتجمع فى أحلامنا
نزيف بينز منه نزيف
- التور -
نغمى عيوننا
وندور سواقينا
بريق عطشان
نلاقى الأرض
بتطبطب وتسقينا
حنين وأمان
وتحدفنا شوادفنا
فنركب نورج الأحلام
وندرس غلة الأيام
ونتجمع سوا فى الجرن
ويبدأ مشهد الإعدام
- الجوزاء -
تهلى علينا فرحانه
بلا حراس
تضمينا
تلفينا مع الطرحه
حواية راس
وفوق منها
العطش زلعه
ونتمشى
لحد مانوصل الترعه
ونتوحد
كما الطينه ف شقوق كعبك
ونرجع بيكى
مرويه
لحد الباب
فتنبح فى اثُرنا كلاب
ونجرى بعييييييييييييييد
لحد حدودنا
مع شعبك
- السرطان -
وفى الدواربيتجمع
عمد ياما وشيوخ ياما
بيتعشوا
ويتسامروا
ويشربوا شاى
يبيعوا فى أرضهم للرايح
يبيعوا فى عرضهم للجاى
وع القهوه اللى فى المركز
خواجه بيبعت الرايح
خواجه بيستلم م الجاى
- الأسد -
على حدودك
عساكر بيضا مرصوصه
وعساكر سمر
وفيل مع طابيه
محبوسه
ف هياكل قصر
ملك ووزير بيجمعهم
خريف العمر
وكان بينهم حصان جامح
لا يعرف خوف
ولا يسامح
بيرمح بين تجاعيدك
يصحينا بأناشيدك
وبينادى
صلاح الدين
- العذراء -
ماعدش مابيننا
يامريم
مسيح تانى
يجمع فى الرجال كالطير
ويحييها
بقدرة ربها
فتكون
ماعدش مابيننا
يامريم
عصا موسى
يقف بيها
قصاد فرعون
ولا عدل النبى طه
لعله انت عارفاها
بقينا بجهل حكامك
عدد فى ليمون
- الميزان -
ويا مريم
رسمتك صوت
بلا صوره
لعصفوره
تزقزق فوق ضلام الليل
تصحى الفجر فى عروقى
وتتشعلق
على قلبى
وتنحت فيه بمنقارها
خريطة حلمنا المبتور
وحالف يوم ما ح اوصل لك
لاصلى الفجر فى بغداد
واصلى الجمعه فى الأقصى
واصلى العصر فى بيروت
ونفطر تمر ع الضفه
واصلى فرضك السادس
واحج واموت
- العقرب -
رميت وجعى اللى متوشوش
على منديلك المفرود
وقلت احكى لى عن بكره
لمحت ف عينك المكتوب
لمحت الزلعه مليانه
عرق جيلك
وع الترعه
كان القاضى
وشيخ منصر
لمحت الجرن كان فاضى
وكان مليان
عساكر بيضا م البندر
ومابتقراش
لمحت فى مشهد الإعدام
قصايد بيرم التونسى
وفؤاد حداد
ونجم فى ركن
كان سارح
وعم امام
وجف النبع من نيلك
- القوس -
لمحت المسجد الأقصى
بيتتاوب
على نومة شعوب شقيانه
فى اللقمه
لمحت الكوفه والبصره
على القهوه
مكان الكومى والبصره
لمحت الحزن فى غزه
وصل بيروت
لمحت التوت
وسجادة صلاه دايبه
لمحت سلاح فى ايد عيل
بيضرب طلق
يوم العيد
بييجى العيد وبنعيد
وننسى ان احنا لسه عبيد
- الجدى -
عشان نقدر نكون احرار
لابد نكون من الثوار
عشان نقدر نكون ثوار
لابد نكون من الشعرا
عشان مانكون من الشعرا
لابد نرافق الكلمه
ولما نرافق الكلمه
ح نتجمع فى زنزانه
ونتدبح .....
نعيش احرار
- الدلو -
( بلاش نضحك على روحنا )
ونبكى ع اللبن وننوح
وندفن راسنا فى الرمله
ونستنى عصا موسى
ونستنى سفينة نوح
- الحوت -
ولا تخافى
لأن الفجر جاى صافى
وشمسك فارده فى جناحها
على غيطانك
كما المارد
فلمى بناتك البكر
ولمى ولادك السكر
ولمى العجزه والرضع
حواليكى
وحلى ستايرك الدهبى
على كتافك
ماتجدليهاش
وفكى البسمه فى شفايفك
ماتربطيهاش
وصلى فرضك المنسى
وماتصلاش
معايا
أو مع يونس
فى بطن الحوت
.......
- أنا الفلكى -
بحبك فى النسيم همسه
واحبك فى الشتا شمسه
وابيع عمرى فدا لحظه
ايدينا فيها يتلامسو
اكيد مره ح نتلاقى
ورب الكعبه يامريم
رومانسيين
ح نتلاقى
ومنسيين
ح نتلاقى
......
