يا عم موت
وارحمنا من ذل السكوت
عشش على وشوش الوطن
العنكبوت
والعن مغاوير العرب
اللي سابوك
في حصارك الملكوت
....
( رام الله ) مش هيه الوطن
رام الله فخ
وانت ارتضيت
سن الخازوق
بين يوم وليله
لما الوطن بيك أتملخ
آه يا جبل
آه يا جمل
كان رمز لرموز الزمن
وف ثانيه نخ
...
الموت أحق من الحياه
لما الجباه
تحنى كرامة عشقها
هذا الثرى
يا هل ترى
لساك جبل
ماتهز فيك الرياح
يا هل ترى
ضحكوا عليك العرب
ومن الرياض للقاهره
منصوب كمين أفراح
وف شرع مين
كان الدولار هوه المزار
وف شرع مين
الشيخ ياسين
مصلوب على كرسى الوطن
مشلول
مبدور تقاوي ع التراب
يروى بدماه
عطش الصبايا المجروحين
يفضح أكاذيب اللى تاجروا بحلمهم
الحاكمين
المحكومين
الخاشعين
الراكعين
الساجدين
على باب نبيهم
( جورج بوش )
يستغفروا ذنب العروبه
ويطلبوا منه السماح
دابحين كرامة شعبهم
ومقدمين قربان محبتهم
لهذا المنتظر
...
يا شعب واقف تحت رحمة
الانكسار
الصمت عار
خد خطوه مره للأمام
وارفض وصاية العاجزين
....
فتح وحماس
مش همه حراس الوطن
مش همه دم الشيخ ياسين
ولا دم طفله استشهدت
ف رحاب جنين
خد خطوه مره للأمام
حاصر حصارك فى رام الله
وموت فداه
وازرع وطن فى القلب
يطرح لك حياه
فجر غضب كل العرب
ح تلاقى إن الضرب فى كل اتجاه
قاوم... وجازف... وانفجر
دا الموت أحق من الحياه
....