الله عليك
على قلبك المرسوم وطن
تمليك
على لون عينيك فى الوجع
صفصافه
بتحاوط على وشوش البنات
حواليك
وتبوس " ضحى "
لما بتتشعلق بحلمها ف رجليك
والكبرياء على وشك " الشامى "
رغم ان سيف الوجع
ساعة الوجع حامى
الله عليك
.............
الله عليك
لما بيتعالج دواك
بالبسمه بين شفتيك
وتحاصر العله مابين
تجعيدة الوش البشوش
وملايكة الرحمه
وتمدد الجسد اللى شايل
م الزمن
مليون زمن
وسنين أسى
كله اتنسى
فى زحمة الملايات
تعليقة " الكالونه " ف وريدك
الحكايات
ضحك البنات
على بابا جدو
وبوسة السيما
وحكاية الشاطر حسن
" احمد حسن "
إسراء ومريم يدوبوا
بين ثنايا ايديك
يسرى الوجع فيهم
فتبوس جبينهم
بنظرتين فى عينيك
الله عليك
.....
الله عليك
على خطك الكوفى
ونقشك الفوانيس ..
على صبرك النيلى
ف اياتك الاحاسيس
الله عليك
ياعود ريحان
طارح على ارضى
الشراقى
يافرع من نيل الوفا
رايح .. وباقى
ياشمس ماتعرف تغيب
يا طهر أطهر م الحليب
يا عندليب
وحياة نبينا المصطفى
طه الحبيب
لو كنت ناوى ع السفر
ابقى افتكرنا
الله عليك
....