كله تمــــــــــــــــــــــــــــــــــام
 
تموت الشمس و الحافى حيصرخ ليه ؟!
حينطق إيه ؟!
نروح للأمس و نقلب
و نتقلب ... و نتغلب
يا تنكسر ... يا نتحسر
و من صمتى بيتبخر و يتنتر
حروف و كلام
و كله تمام ....... !!
و يجى الأيزو ويا الجات
ولاد وبنات
لا فيه شغله و لاحكايات
و حنصدر بلح أمهات
و أستورد لأمى الديك ... و دى صرخه
و أستورد لابويا فريك ... مع الفرخه
و أستورد لشعبى شريك ... بلاش نفخه
يزغزغنا ... يدغدغنا
يعشينا بأى غموس
و يتشطر و يتمنظر
مفيش ريحه و لا منظر
و أنا اتكسر ... و أتحسر
و من صمتى بيتبحتر و يتنتر
حروف و كلام
و كله تمام .....!!
و دا محافظ ... منين ما يروح
هموم الناس ... تزيد و تفوح
" على الأحمر " ... يموت مجروح
حنقرا عليه يس أو نوح
يس الطوب ... بيتألم
يقول المد يتلملم
تشوفه الصحرا تتندم و بتبلم
و ناس تبكى و تتشكر
و ليه دايما بيتنكر !!
و يقفل بابه و يسكر
و يتحجر و لا يكبر
و يتكبر .... !!
و أنا اتكسر و اتحسر
و من صمتى ... بيتبحتر
و يتنتر ... حروف و كلام
و كله تمام ......!!
ودا مسئول قطاع أعمال
نضيف المخ ... خالى البال
مس و صباح يقول تخصيص
و ناس بتموت و ناس بتهيص
و ناس عايشه  و لا البلا ليص
مناها المحشى و القراقيص
و ناس تتعشى بالكفيار
و تحلم  بس بالمليار
و لسه سنين حنستنى
عشان الحلو يتهنى
و يعلا لفوق و يتغندر
و أنا أتكسر و اتحسر
و من صمتى بتبحتر و يتنتر
حروف و كلام
و كله تمام
انا حافظ كتير أسرار
و دا محافظ مالوش أفكار
بيصحى الفجر يتمطع
و يتنطع ... و يتطلع
و بيطلع عشانى قانون
مفيش آمن و لا من مأمون
مفيش حارس و لا محروس
نقول  بحرى ... يقول قبلى
يزيد حيرتى ... يزيد غلى
يا رجله تبوس
يا أما يدوس
و أنا اتكسر و أتحسر
و من صمتى بيتبحتر و يتنتر
حروف و كلام
و كله تمام .......!!