وعرفاني
أنا منك
وموالى بيحكى في الهوى عنك
بيحكى قصة حيرانة
بتنده في الطريق الحلم
تلم حروف بتتسرسب
على الدمع الغريب اللحن
أشوف حدود معالمها
تروح في العتمة شيلاني
********
وعرفاني
وعارفة إني أنا خلك
وعارفة كمان بشاورلك
على الجرح القديم
في السر
على الجرح الجديد
في الهجر
على الكلمة اللي غرقانة
ومش عارفة طريق البر
على الصمت اللي شل لساني
وعرفاني
وعارفة بكام صبح دمك
بلقمة عيش ومحروقة
على عصب الولاد السمر
برسم مريض على
كل الوشوش الحمر
بهزة وسط مجنونة على الريالات
بمنديل كلينكس مستعمل
بعقب سيجارة "كليوباترا"
بحق "كاكولا " مش كسبان
بتذكرة قطر عداها
بقزازة كحة مشروبه
بعلبة سمنة مقلوبة
بكاس من بيرة مغشوشة
بعشرة طاولة مهزومة
بعضمة فرخه مرضانة
بعود كبريت قشر البيض ...
بضحك عبيط ...بفتلة خيط
بذرة ملح ... بنقطة زيت
بكلمة رخيصة مرمية
على جنب الرصيف في البرد
بدمعة حرقة حضناني
وعرفاني
وعارفة ازاى بقى حالي
وأنا مرسوم على بابك
حزين مستني لجوابك
مجنون في الحب والبلوى
سنين مشتاق تضميني
وتحكى لي عن الشاطر
وست الحسن
صغير يا حبيبتي
مش قادر على شيل
التقيل "م" الحزن
غريب يا حبيبتي
مش عارف ألاقى
لضحكتك عنوان
طريد يا حبيبتي من كفك
ونفسي أبطل التوهان
صغير محتاج لحكاويكى
ولكن فرغت الحواديت
وصار الشاطر الفارس
بليد مركون على الحيطة
وست الحسن حيرانة
بتخدم صاحبة الزيطة
وأنا لسه بقول الحلم
وأقول دي حبيبتي
شرياني
*******
وعرفاني
وعارفة إني أنا مهزوم
من الوجع اللي فارد
كفه على قلبي
من النايمين على فرشي
بأمر الغول
من الخوف اللي بقع
لونه في عبايتى
من الترابيزة والنايب
من الكراسة والواجب
من الابلة اللي عطيانى
دروس ع الحجر ساعة الليل
من بنت الجيران والسهد
والولد اللي قصده الكيف
من عصر انفتاح الست
"ع" الغجرية والهوسة
من البحر اللي خان الشط
وباع نسماته علشانى
*******
وعرفاني
وعارفة إني مش غجري
ولا والدي زعيم كداب
ولا شيوعي ولا ثوري
ولا صورتي على الأفيشات
ولا عنتر ولا بيبرس
ولا أبو زيد
أنا مكتوب أكون إنسان
وعنواني أكيد منسي
كما العناوين
أنا ملاح في بحر الحلم
مش عارف أمان الشط
أنا دمعة في عين الضعف
مخفية في بير الصمت
أنا مولود ورا الكواليس
في مولد صاحبه مش فايق
أنا عاشق على الموال
حبيب بيحب ما يطولش
عشان بيقول ولا يخبى
أنا سواح
وضاع عنواني على يدك
بطوف في الليل
ومش عارف طريق الصبح
أنا مداح هويت صورتك
بغنى يا ليل يا صاحبي
وأقول يا عيني خبيها
ولا تبوحي بسر الحلم
وسيبي ايديها تحضني
وتسكن جوه وجداني
*******
وعرفاني
وعجبانى
لما تفك ضفايرها
في وش الشمس بتجنن
ساعتها بطير كما العصافير
وأبوس الحلم في جبينها
ساعتها بكون أمير مفتون
وأحنى الفل في ايديها
بحبك ياللى محبوسة
في بحر النمل والعقرب
بحبك بالسكوت المر
بحبك همسة من قلبي
بحبك صرخة من جدي
بتقطع يد من سرقوا
بحبك وارتعش لما
بتيجى يدي فوق الجرح
بحبك واعشقك كلك
وأقدم دمى ده مهرك
وحلمي عقد على صدرك
بحبك زى ما تكوني
عجوزة تلمي أحزاني
صبية تملى أحلامي
قديمة...دميمة وعنيدة
أميرة ...جميلة وغنية
عزيزة ...مهانة ... منسية
كريمة وخاينة ووفية
بحبك غنوة وردية
لغيري تكوني أو ليه
بحبك ملحمة عاشق
تعيش في قلوب بنات الحي
بحبك وأرسمك لوحة
تــتوه موناليزا
في التفاصيل
بحبك وأزرعك وردة
في كف الحلم عشقاني
*******
وعرفاني
وعارفة إني ليك هاموت
بحلمي جوه بحر الصمت
بشعري بره بطن الحوت
هاموت لما يبقى الليل غطاكى
في الشتا "م" الغدر
هاموت لما يصحى الصبح
على صوتك ينادى النور
صباح الخير.........
صباح النور.........
صباح بيهد قلب السور
هاموت لما يمشى النمل
بعيد عن بنى العصافير
هاموت فوق ايديك وصدرك
وأنا واقف بحنى الحلم
هاموت وازرع الكلمة
على قبري شجر أخضر
هاموت يا حبيبة
ويمكن تكوني لسه
فكراني
وعرفاني
