حـواديـت عـاشــق

مانيش حلمك
ولا البطل اللي في الحكايات
مانيش طيرك
ولا النغم اللي في الكلمات
أنا عاشق
وعشقي مات
من امبارح
ومن أول ما ضاع الحلم
ومكتوبة على بابي
حروف الآهة مكتومة
بتنزف دمعة مخفية
أنا عاشق
وعشقي حروفه منفية
في وطن الحسرة
في النسيان
غريب مالهوش جنسية
وحيد محتاج لحرية
بينده والندا خايف
يتوه في السكة
ما يعديش
أنا عاشق
وعشقي قلب درويش
حزين مالهوش في الأفراح
يغنى "ع " الربابة الآه
دواه في الداء يا آواه
وشجن الناي
جوه حشاه
أنا عاشق
وعشقي بلاد
ماهيش ليه
قصيدة شعر مجنونة
ومرسومة على جدار
الليالي السود
وردة صغيرة مجروحة
بخنجر غدر مسموم
طعن ضحكتها
سال الدمع
على وش القمر انهار
أنا عاشق
وعشقي كان
أنا عاشق
وكان ياما كان
ولد بيحب حدوته
بترعي فيها بنوته
بتتلاعب مع العسكر
قعد يسكر
على قبر البنات
الحلم