المستخدمين
المستخدم:
كلمة السر:
المنتديات اتصل بنا تسجيل الرئيسية
 
Your Ad Here
شاعر الأسبوع
شاعرة الأسبوع
قصيدة الأسبوع
أخبار وأحداث New
تباريح أنفاس الشمعة
للشاعر محمد جابر المتولى

تباريح أنفاس الشمعة

الشمعة اتحرقت خالص
ودموعها نشفت على سطرك
ومشاعرك ساحت
أيامك على قدك
وملامحك باهتة
مخطوفة بأيادي الخوف
والشوف
فى مساحة الرؤية
متمركز فى البؤر الغايبة
لحكايا الجدة المنسية
الشاطر وحصانه الابيض
ونهاية لبداية النوم
مرسوم فى القلب الشاطر
مغلوب فى السكة الشوف
يتكعبل فى حبال مشدودة
ما بين الأبراج الخاينة
ومنارة الكدب الموصوم
متاريس جوه الأنفاس
والصدر يحشرج مكتوم
من منعه لزيارة الفجر
متاريس حتى الكراريس
مرسومة مشانق للبوح
مجروح
يسقط يتساقط
فى البير الساقعة 0 يتقلب
ولا لاقى مايه ولا قاع
محتاج لك 0 خليكى معاه
اتسلى بربيعه النابت
واتملى دفئك من صبره
اتغطر بورقة أحلامه
من جسده عبى أوهامك
أملاكك 0 كرمه فى شرايينه
والقلب ده معطوب م الحزن
على أرض خريفه فارقيه
وبإيده خنقى عصافيره
وأرميهم بحروفه الناشفة
فوق شجره العريان الواقف
فى ميدان الممنوع م النصر
مغلوب مستسلم 0 واضح
من صورتك فى جدار الواقع
وحنانك لوجودك باهت
بيمطر عالكل وسايب فى كيانك
بقعة منسية
مليانة من دم الحلم
اللى دفنته
فى أمانى غابت وأحتضرت
فوق إيد اليأس
وف كونك انت المكتوب
شمعاية عايمة فى الريح
وهى قايدة ضد التيار
فوق ايدك تعطى وتدوب
وبتمسح الدمع بروحك
مسكون بدنك 0 تباريح
لو تحزن 0احزن واتألم
وصراخك يرجع جواك
يدميك 0 يحبس أنفاسك
يشعلها
تنور أفكارك
أحرقها تانى هتنور
السكة وكيانك يضوى
                                 
                                                        تمت


محمد جابر محمد متولى
نادى ادب قصر ثقافة اسيوط





















إبنــــــك الشعبي
يابنت الايه
انا مش بيه ولا باشا
ولا حتى بحاول ابقى واتنطط
انا صغير ما بسوى فى كراريسك
ثمن باين لحبر أسمه
انا شيال بشيل الهم بالعافية
تحت الحيطة تلقانى
فى بدرومى بنتش
غربتى منى
وادور فى زبالتنا عن الواجب
وطعم الانتماء المر
ما هوانا ابنك الشعبى
ابن الشعب والحارة
بتوه فى الزفة واتكلفت
بمسكنة خايبة والدوخة
تكبكب راسى فى الجزمة
بنشر حزنى فى هدومى
على حيطة عجوزة
ومايلة على ضهرى
ببلع كلمتى علقم
لسانى قليته من بدرى
فى طاسة صمت محروقة
بنام مأسوف
واقوم مكسوف
وأكش فى جلدى من خوفى
ماليش دعوى بسارقينك
ولالى فى اللى خاطفينك
بعيش وانا تحت سكاكينهم
بعضمى سفلتوا الشارع
بحلمى مشوا مجاريهم
بصمتى فتحوا السستة
وباعوا حتى أعضائى
وريث وورثت من أبويا
نعم حاضر يا أسيادى
أوامرك تمشى على راسى
بطاطى واطاطى واطنش
لحد الريح تعدينى
واخلينى فى هامش
منسى احسن لى
وأفكر امتى يا يومى
تعدى وعقلى مستنى
أمصمص عضمتى الراضية
بإستسلام بلا رجعة
رميت عصبيتى وشالى
وصارت راسى مكشوفة
وكل كيانى متقطع
ومرمى فى سكة تكوينى
وميهمش ولا هامم
أكون أو لا000 مبيهمش
أخبى كل تكويني
في كلمة واحدة تجرحني
أعيش في هدوء بيسكرني
وأحبك برضه بهدوء
بهمس ما يفارق قلبي
عشان صوتي ما يطلعش
بحبك أيوه بهدوء
عشان حبك ده ممنوع
محرم في القوانين
بحبك سر أسراري
ولو أفشوه هتلعني
وصلبي علني هيكون
في وسط ميدان يكون شعبي
لأني أبنك الشعبي
ما هو أنا أبنك الشعبي
يا بنت الايه

شعر الفصحى
شعر العامية
شعر الأغنية
الشعر الجاهلي
الشعر الإسلامي
الشعر العباسي
الشعر الاندلسي
الشعر النبطي
شعراء الطفولة
المرآة الشاعرة
دمــــوع لبنــان
المونولوج والفكاهة
فن الدويتو
مواهب شعرية
علم العروض
قالوا فى الحب
 
البحث
 
كلمة البحث:
بحث فى الشعراء
بحث فى القصائد