تباريح أنفاس الشمعه

الشمعه اتحرقت خالص
ودموعها نشفت علي سطرك
ومشاعرك ساحت
أيامك علي قدك
وملامحك باهته
مخطوفه بأيادي الخوف
والشوف
في مساحه الرؤيه
متمركز في البؤر الغايبه
لحكايا الجده المنسيه
الشاطر وحصانه الابيض
ونهايه لبدايه النوم
مرسوم في القلب الشاطر
مغلوب في السكه الشوف
يتكعبل في حبال مشدوده
ما بين الأبراج الخاينه
ومناره الكدب الموصوم
متاريس جوه الأنفاس
والصدر يحشرج مكتوم
من منعه لزياره الفجر
متاريس حتي الكراريس
مرسومه مشانق للبوح
مجروح
يسقط يتساقط
في البير الساقعه 0 يتقلب
ولا لاقي مايه ولا قاع
محتاج لك 0 خليكي معاه
اتسلي بربيعه النابت
واتملي دفئك من صبره
اتغطر بورقه أحلامه
من جسده عبي أوهامك
أملاكك 0 كرمه في شرايينه
والقلب ده معطوب م الحزن
علي أرض خريفه فارقيه
وبإيده خنقي عصافيره
وأرميهم بحروفه الناشفه
فوق شجره العريان الواقف
في ميدان الممنوع م النصر
مغلوب مستسلم 0 واضح
من صورتك في جدار الواقع
وحنانك لوجودك باهت
بيمطر عالكل وسايب في كيانك
بقعه منسيه
مليانه من دم الحلم
اللي دفنته
في أماني غابت وأحتضرت
فوق إيد اليأس
وف كونك انت المكتوب
شمعايه عايمه في الريح
وهي قايده ضد التيار
فوق ايدك تعطي وتدوب
وبتمسح الدمع بروحك
مسكون بدنك 0 تباريح
لو تحزن 0احزن واتألم
وصراخك يرجع جواك
يدميك 0 يحبس أنفاسك
يشعلها
تنور أفكارك
أحرقها تاني هتنور
السكه وكيانك يضوي
                                 
                                                        تمت


محمد جابر محمد متولي
نادي ادب قصر ثقافه اسيوط





















إبنىىىىىىك الشعبي
يابنت الايه
انا مش بيه ولا باشا
ولا حتي بحاول ابقي واتنطط
انا صغير ما بسوي في كراريسك
ثمن باين لحبر أسمه
انا شيال بشيل الهم بالعافيه
تحت الحيطه تلقاني
في بدرومي بنتش
غربتي مني
وادور في زبالتنا عن الواجب
وطعم الانتماء المر
ما هوانا ابنك الشعبي
ابن الشعب والحاره
بتوه في الزفه واتكلفت
بمسكنه خايبه والدوخه
تكبكب راسي في الجزمه
بنشر حزني في هدومي
علي حيطه عجوزه
ومايله علي ضهري
ببلع كلمتي علقم
لساني قليته من بدري
في طاسه صمت محروقه
بنام مأسوف
واقوم مكسوف
وأكش في جلدي من خوفي
ماليش دعوي بسارقينك
ولالي في اللي خاطفينك
بعيش وانا تحت سكاكينهم
بعضمي سفلتوا الشارع
بحلمي مشوا مجاريهم
بصمتي فتحوا السسته
وباعوا حتي أعضائي
وريث وورثت من أبويا
نعم حاضر يا أسيادي
أوامرك تمشي علي راسي
بطاطي واطاطي واطنش
لحد الريح تعديني
واخليني في هامش
منسي احسن لي
وأفكر امتي يا يومي
تعدي وعقلي مستني
أمصمص عضمتي الراضيه
بإستسلام بلا رجعه
رميت عصبيتي وشالي
وصارت راسي مكشوفه
وكل كياني متقطع
ومرمي في سكه تكويني
وميهمش ولا هامم
أكون أو لا000 مبيهمش
أخبي كل تكويني
في كلمه واحده تجرحني
أعيش في هدوء بيسكرني
وأحبك برضه بهدوء
بهمس ما يفارق قلبي
عشان صوتي ما يطلعش
بحبك أيوه بهدوء
عشان حبك ده ممنوع
محرم في القوانين
بحبك سر أسراري
ولو أفشوه هتلعني
وصلبي علني هيكون
في وسط ميدان يكون شعبي
لأني أبنك الشعبي
ما هو أنا أبنك الشعبي
يا بنت الايه