طلاق بالتَّراضي ... مع طرف ثالث مشتاء ابكي على نَهدك دَهر و ايدي بِرقَّة تـزور ممـلـكة الشَّعر و تنزل على خدك بعد دهرين .. زخ شلال نازل مستحي يبوس النّهــر و النّهر شَطين نسيو ... تصالحو سبحان الله كيف حطو بمطرحو شكلو ورق كينا لما بتبتسم و شو بيشبهوا للقلب لما بتفتحو بتتذكري ! لمَّا استعجلت أمك .. بظن و قصّت ضفر من إصبعك لتعلمك عالفن مرّ الهوى طاير و طيَّر هالضِّفر من يومها كل ما بشوفو للهلال بجن قالت : و أنا جنّيت بس السبب .. ثاني مبارح كنت مرتك و اليوم تنساني ! عندك سبب شرعي من شان تتركني ! حاولت جاوبها و قفت .. مربّط لساني ليش فيني جاوبها أنا ، و قلها بهالعصر صار الزنا مسموح و صار الحلال كفر خليك عالمستور .. و لا حدا يشوفك مَثْنَى و َثُلاَثَ و َرُبَاعَ صارتْ للذكر قلها أنو المجتمع سكَّر عليّ تروس ؟ وصار الشَّاطر بِالحكي يعطي حكم و دروس قلتلها .. بس بقلبي قبل ما ودّعا سامحيني .. كنت مفكر .. بس يلا الحياة دروس شالولي حصتي من القهر حصة ملك ترك عرش الهوى و هوى و صار بايدكي بينملك و مجنون ليلى يمكن صاحبلو حدا أما أنا مخلوق اخلصلك إلك بحلف مرة و مرتين و ألف أقسم بالله لا حدور ولا حلف و شهودي عجنبي عاليمين و عاليسار إن كنت كذاب من بعد الحلف كنت عايش بالحياة منيح ولادي و بيتي و شغلي و مستريح و فجأة يلي ما حسبتو صار قلبي فرد الشّراع .. خبط بالريح. لك كنت شوفك مثل باقي خلق الله بعدين شو يلي صار هادا شغل الله و بالشّعر ممنوع تكرار الاسم بس أنا بالقوافي ما بغير اسم الله و الله يلي خلق بالناس المشاعر و ما بدها شرح هي وقعة الشاطر و قعت و ما حدا سما عليّ بس يمكن على راسي إجيت قمت صرت شاعر و مرة على مرة على مرة صرت حبك و حبك و كبرت الفكرة وأنا قلت بعدل هادا الشرط مطلوب تاري بباب الحارة و بس مسموحة هالضّرة بتأسف إني طولت القصيدة بس الحكي عندي ما بتسعو جريدة بيشمّت العزال من كثر وجعي و بيزّعل الأحباب هي شغلة أكيدة و ليلي بتفهم علي من يوم يوما إذا هاليوم غارت مستحيل لوما مو ضعف مني ... بس من فرحتي أنا بمسقط رأس جدي أنا بدوما د.عماد الدِّين طه دمشق - السبت : 24-4- 2009
