كان نفسي ابقى رسام
كان نفسي محتاجش لكلام
اعبر عن اللي حسه
بس بفرشاة وشوية الوان
كان نفسي ابقى طيار
كان نفسي ابقى بحار
ابقى شاعر واملى الدنيا اشعار
او حتى ابقى واحد من الثوار
كان نفسي ونفسي ونفسي
ابقى اي حد الا نفسي

كان نفسي ابقى جنايني في جنينة من غير حدود
امسك خرطومي واسقي الورود
اشوف الحبيب بعين الحسود
وهو مع حبيبته ام الخدود
اهي دي عيشة عال العال
تنفع قصيدة او حتى موال
عيشة رايقة
عيشة عايقة
مش عيشتي بنت المتضايقة
عيشة مدفونة تحت الرمال

وفي يوم صحيت على صوت مهول
ابواق تزمر مع دق الطبول
اصوات تقول اصحى يا انسان
اصوات لناس اشكال والوان
وقفت اسأل انتوا ايه؟!!!
قالولي احنا اللي نفسك فيه
احنا البحارة والرسامين
احنا الشعراء والطيارين
وواحد بقوة وبأعلى حس
يصرخ يقول قرب وبص
تعالى اختار حياتك بايديك
وبكرة هترجع بدمعة عينيك
تقول يا ريت اللي جرى ما كان
لو بس ارجع زي زمان
ارجع لحياتي اللي اتولدت عشانها
دي حياتك رسالة ولزمن تكملها
على كل حال من غير ما تحتار
تعالى ارمي بنفسك فالنار
وتعالى نقي وتعالى اختار

معانا طيار .. كائن شريد
مقضي حياته دايما وحيد
واهو طار ورفرف فالفضا
لحد ما العمر انقضى


ومعانا جنايني ماسك خرطومه
على كدة من الصبح لاخر يومه
يرجع يستريح ما يلاقي فرشة نضيفة
على كل اهو راضي بحياته السخيفة

استنى يا عم ده الجي احلى
ياللي شايف حياتك دي واحلة
معانا لسة شاعر تمام
حابس حياته في شوية كلام
ولا له صديق غير بنات افكار
افكار غبية اتعملت اشعار
لراضي هو باللي كاتبه
ولا اللي كتبه راضي بيه

يا ابن ادم صحصح
قبل ما تحلم وقبل ما تسرح
فكر شوية وشغل عقلك
ده عقلك هدية من ربك
ربك خلقك برسالة لازم توصل
وهتوصل مهما يحصل
دي حياتك متعة حصرية
ده لو قعدت تدور سنين ضوئية
مش هتلاقيها في حياة حد غيرك
فاصحى بقى وحكم ضميرك
نصيحة بقدمها لك
لو قاعد تدور على ميزتك
ميزتك لوحدك .... هي نفسك