بحلم ومفيش في ايدي غير كدة
بحلم ما هم حرموا ده وده
مبقاش في ايدي غير الحلم الجميل
يا عم احلم ما هو على قفا مين يشيل
احلم قبل ما يتخصص
ده الحلم جنب اخواته مترصص
بس اعمل قرد واقعد اترقص
برضه مش هتحقق الحلم
مكتوب علينا نعيش فالخيال
مكانك مش عالارض ده فوق الجبال
احلم براحتك ومش هيمنعوك
احلم انك عايش بين الملوك
المهم تبعد عن الحقيقة
خليك في مشاعرك الرقيقة
سيب لهم الدنيا الخنيقة
وخليك انت فالحلم
دي حكاية راجل بسيط
اسمع وافهم .. هيص وزيط:
في يوم حلمت بعالم تاني
وفضلت احلم ونسيت زماني
حلمت بعالم كله حنان
حسيت بحب وعشت في امان
حسيت بطيبة
يا عم بلا خيبة
الطيب فالزمان ده بقى انسان ضعيف
انسان مريض انسان كفيف
كل اللي بيشوفه خبال هلاس
عمره ما بيشوف اللي بيشوفه الناس
بس طول ما انت قاعد في حالك
متشغلش بالك
وخليك انت فالحلم
طب انا هثبت لك ان الحلم هيبقى حقيقة
واكيد فيه الف طريقة وطريقة
الراجل اتجنن يا جدعان
حلم ايه بس اللي عايز يبان
خليه مستور
ميشفش النور
ده الحلم مدفون في اعمق البحور
نزل الراجل يكلم الناس
انا حلمي عايز شوبة احساس
فيها ايه لو رجعنا نحب بعضنا
فيها ايه لو رجعنا نشغل قلبنا
هنعيش في سلام هننسى الحروب
هنرجع زي ما اتولدنا من غير عيوب
وده واحد بضحكة خبيثة مش عايزة تبان
ابعده عنه مش ناقصة جنان
واللي يقول مسكين
واللي يقول اطلبه مستشفى المجانين
يا عالم ياهوه انا عاقل مش مجنون
انا عندي حلم هيغزو الكون
الراجل يا عيني من كتر الحماس
عقله خف واتجنن خلاص
ودي كانت نهاية الراجل البسيط
فهمت يا صاحبي ولا ... هتفضل عبيط !!!