خلاص يا شباب مفيش اشعار
وانا بعترف ... طلعت حمار
مش لاقي حاجة اكتبها
كل ما ابتدي في حاجة بخربها
يظهر اني كنت مخدوع
وطلعت عيل جربوع
معلش خدعتكم معايا
واللي انا كتبته على هوايا
طلع اي كلام في كباية
مش قادر اطلع حاجة سليمة
ولا حتى كام سطر عليهم القيمة
يظهر ان الوحي كان غلطان
ده بجد غلط في العنوان
انا حاسس عقلي عامل ميت
وقلمي عايز يتزيت
من الركنة من غير شغلانة
واه يا بنات افكاري يا غلبانة
مش عارف استتكم ولا اهنيكم
وشكلي كدة هتشحطط بيكم
تفتكروا ايه اللي جرى لي ؟؟؟
شدة وهتزول ؟؟؟؟
ولا خلص المفعول
بتاع حبوب التفكير
ولا انا محتاج تغيير ؟؟
اخرج اصيف اشوف البحر
يمكن اطلع منه بفكراية
او انزل اقابل بنوتة
ممكن تلهمني بضحكاية
محتاج الاقي حل ضروري
مش عايز اخسر جمهوري
ولا احسن ارد الباب ؟؟
واعيش في اكتئاب
ما انا خلاص طلعت نكرة
مش عارف اطلع بفكرة
اعمل منها اغنية
والناس تقول لي وهمية
ايوة وجدتها !!!!!
انا شاعر لسة بقالي شهور
ولسبب ما بقيت مشهور
وده زعل شعراء ابوللو
وقالوا ده هيسرق جمهورنا كله
ولما لقوا شعري احلو
قالوا لا ده هياكل الجو
قاموا عملوا لي عمل مخيف
نساني التأليف
طب اعمل ايه حد يفهمني !!!
اعوص ايدي فالدم وارسم خمسات
ولا اكتب على ضهري الحلوة عليها اقساط!!!!!