كراسة بتلخص حياتي وما فيها
فيها جمالها وفيها بلاويها
كراسة فيها معاني وعبر
معاني كتير متهمش البشر
تهم بس.. انسان يتيم
شايف مكانه فالعصر القديم
انسان غلبان
عايش جبان
بيحلم بحضن فيه الامان
انسان مغلوب
انسان مرعوب
عايش حياته وقت الغروب
ملوش فالنور
مجرد عصفور بجناح مكسور
بتنهش في لحمه كل النسور
دي صفحة فيها يوم الولادة
قال ايه بيبكي من كتر السعادة
فتح عينيه على دنيا سادة
مسكين مش عارف حقيقة الحياه
مولود غريب مش من هنا
مش هي دي دنيتي انا
انا كنت بحلم بدنيا الهنا
مش هو ده اللي بتمناه
ودي صفحة بيكبر فيها العمر
اصحاب تهدي واصحاب تمر
بيدور فيهم على صاحب يسر
ملقاش غير الزيف والخداع
صفحة سودا من كتر الغيوم
كلها مشاكل كلها هموم
كان نفسه يفرح بس يوم
معرفش يفرح والقلب ضاع
على صفحة تانية رسمة محب
كيوبيد وصل والقلب طب
والحبر سال لما اتكتب
بالحبر جملة ... راح الحبيب
حتى الحبيب هجر وساب
فالقلب جرح يزيد العذاب
لا الجرح خف ولا قلبه طاب
ولا يشفي قلبه لمسة طبيب
عالجلدة كاتب نهاية حياته
طبول تدق تعلن موعد وفاته
مفيش يا عيني اللي يحزن عليه
مفيش اللي يشيل تابوته بايديه
ورغم كدة القلب مبسوط
مش خايف منك يا موت
ده انا من يوم ولادتي بصرخ باعلى صوت
عايز اموت ... عايز اموت