الهلس في ايده يهد صخور
الهلس يقدر يشق بحور
يخلي الاعمي يشوف النور
يقول فتحت
طب بص لتحت
معقول انا سابح فالسما
انا سبت الدنيا ملغمة
سبت الفقر سبت العمى
وصبحت ولا اجدع هلاس
ده الهلس كان ومازال
يطيب جراح وينقذ اجيال
يشق صخور يهد جبال
يستر يُتم كوم عيال
وانت يا صاحبي
مش لازم تخبي
ده انت مصري
ولولا الهلس مكنتش عايش
بيقولوا المصري ده اخف دم
وهيعمل ايه ما هو من كتر الهم
سبع تلاف سنة والهلس ساندنا
وهنعمل ايه ما هو مش بايدنا
مكتوب علينا نعيش غلابة
والله الغلب هلكنا يابا
ويطلعوا علينا الهتيفة
يقولوا لنا دي عيشة جامدة عيشة نضيفة
واحنا بين كل مصيبة ومصيبة مفيش
من عبارة لقطر لطابور عيش
لو دولة عاشت احوالنا
لو جرى لها نص اللي جرى لنا
كانت ناسها ماتت بالملايين
والسبب الوحيد اللي مخلينا عايشين
اننا بالهلس نايمين صاحيين
وادي مسئول
طالع يقول
برخص التراب بعت عمر افندي
والحمد لله فلوسه عندي
واهو دلوقتي انفلونزا الخنازير
والحمد لله مبتجيش غير للفرافير
جهز يا ابني الطراطير
مصيبة تانية وجية لنا
روح نادي الهلس يحصننا
وانا دانا انا دندن
بالهلس الشعب المصري تفنن!!!!!