الله بالخير يا حاكم قطر
امتنا في خطر
من إسرائيل ورعيان البقر

الله بالخير يا آل ثاني
ياما إنعاني
من إسرائيل وضعف العنَاني
ذقنا الذل و حق المثاني
وراح العصر
وراح تاريخ قديم أندثر
وشعوب العرب في عمرها الفاني
من دون البشر
شافت ويل في الدهر الغبر
وفيه حكام باعتها أوطاني
بيعة خسر
حياها مات وضميرها انتحر

الله بالخير يا حاكم الدوحة
نستاهل النوحه
شعوب العرب كل واحد أبروحه
كل واحد عليل تدمي أجروحه
وفيها إيعاني
وأمريكا علينا تهد في المباني
وكل حاكم إيريد امشّي إطروحه
وهو أمريكاني
وما ليش في العرب غير اللساني
وإنضام الشعب وغابت فروحه
وشافيز يالثاني
عرّاهم تعراي عود الغصاني
ما شي خافي أمورنا مفضوحة

موش للمعاني
ومعروف منه علينا الجاني

الله بالخير يا حاكم وأمير
ريت هال مصير
اسود سواد ليل العسير
أنهّنا علي يد أمريكي حقير
والشاهد الغاني
ومسانده بلير والباكستاني
وكمين حاكم عربي ووزير
سعودي... عماني
كويتي ..مصري..أردني..بحراني
علي شعبهم عالنين النفير
ومع الأمريكاني
أخ وصديق والحبيب الدّاني

الله بالخير يا سيد السبيب
إنريدوا طبيب
إداوي أجروح حارقات القليب
ويرد الكرامة للوطن السليب
وتغمض أجفاني
وتفتح علي نصر فاقدينه زماني
ويعلا الهلال فوق الصليب
ويندحر الجاني
وتنزاح عن وطننا جيوش الغريب
ما يعود ثاني
يرحل رحيل دولة العثماني

ويا حاكمين الدوحة
نا خاطري متكدر وكاثر نوحه
من شين الفعايل

يا حاكمين دبي
شعب العرب لا ميت ولا هو حي
والحاكم عليهم مو مخلي شي
كوش علي ثروة الوطن أبروحه
في الشمس نقعد و هو مكانه الفي
نشرب المالح وناكل المنطوحة
وهو مونته الكفيار والويسكي
وعلي إذلال شعبه نيته مفتوحة
وعلي أمريكا احنين ضميره حي
ونحنا علينا نيته مفضوحة

يا حاكمين عُمان
شعب العرب صابح مريض جبان
بين العوالم مندلي منهان
جميع العرب ما عاد فيهم نوفه
أحرار العرب راحو في قولة كان
ذوايح اتدور عالنجا ملهوفة
والخاين تعلا فوق تما شان
صايل وجايل كابرات اكتو فه
باسمه أمريكا دمرت لأوطان
وباسمه يموتوا شعبنا في الكوفة
وباسمه إدمر شعب في لبنان
نذالة أمريكا واضحة معروفه

يا جامعه عربيه
يا أم المصايب عال عرب جمليه
يا فاشلا في حل أي قضيه
قراراتك عقيمة بايدا معروفه
من واشنطن قراراتك إتجي ممضيه
وتقريها علينا مانك اللي مكسوفة
لا شجب لا تنديد للعبرية
وسط المحافل وردتك مقطوفة
علي خط الأمريكان ميه الميه
ونحنا العرب ما عندك علينا روفه
يا جامعه فينا أرضيتي السيه
بجميع المصايب أوضاعنا محفوفة

ويا حاكمين الدوحة
نا خاطري متكدر او كاثر نوحه
من شين الفعايل