قصيده هنا القاهره
هنا القاهره
أيها الساده جاءنا هذا البيان التالي
من صاحب الفخامه والمعالي
السيد شاهبندر التجار الهلالي
حضره المسئول صاحب المعالي
اللي كعبه علينا عالي
وخطر زي التيار العالي
الغالي
والغالي علينا غالي ولاعمره يتنسا
حلوين من يومنا وأحوالنا متوكسه
ووشوشنا متبكسه
والعقول نضيفه . تقولش مكنوسه بمكنسه
و أيد الغلابه في الكلبش متدبسه
نفسهم في حته عضمه بالشغت متلبسه
نفسهم في لقمه متغمسه
انشاالله يحلو بحته ملبسه
أيه رأيك يا حضره المسئول ¿
أيها الشعب المخبول.
ان الميزانيه معجزه
والبخت مايل وعايزله معجزه
وكام مشروع تطوير علي كام أتفاقيه مركزه
وياسلام لو جتنا منحه
تفك المحنه ويا حبذا
تدلعوا يا شويه غجر
ونحط لكم الأكل في البزازا
وتفرحوا وتتمرجحوا وتروحوا تناموا وهكذا
وتناموا وتأنتخوا وتضحكوا وتسخسخوا
وترقصوا وتفخفخوا بس أوعي تلبخوا
ياسلام بس ده عايزله معجزه
أيها الساده نأسف عن هذا العطل الفني
!!!!!!!!!!!!!!!!!!!!!!!!!!!!!!!
ونكمل اليكم البيان
بسم بلدنا الموكوسه
مصر المحروسه
المحتاسه حوسه
وشبابها المنحوسه
والبتاع الكوسه
اللي واكلاه السوسه
أيها الساده
بعد كل شيء متخصخص
والحكومه بتهجص
والشعب علي السلالم أترقص
والمسئول هرب وملص
والمواطن الغلبان فنيص
ودم الغلابه أتمصمص
وجناح الحق أتقصص
وبقينا نتقرطص
أيها الساده
ضحكوا عليكم وقالوا لكم ديموقراطي
عيشوكم في عالم أفتراضي
وبيقيتم علي الرف وأحتياطي
أيها المواطن ليه تسكت وتقول راضي¿
قول لأ ليه صوتك واضي¿
أرفع راسك أوعي تطاطي¿
أنت في بلد ديموقراطي
أيها الساده حال مصر
كلامنجيه وبتوع لاك
واحد هرب وفك
و واحد ستف في البنك
وناس معكوكه عك
وناس علس قفاها بتسك
أيها الساده اليكم حال المسئولين
حال المسئولين تطنيش
وفي الشعب تلطيش
واللي يجي في الريش بقشيش
واللي عاجبه علي كده يعيش
يا حضره المسئول
الناس عايزه تاكل عيش
الازمه مش أزمه بطاله ولا حشيش
ألأزمه أزمه عقول طرابيش
عشمتوا الناس بي بكره
وبكره بتاعكم مبيجيبش
