أنا كنت ناوى
حسيت وأنا مجروح
وخانق ضحكتى
بدموع وآهه
حسيت وانا ....
ف عز المتاهه
من صيف شتاها
خطيت ف أول   سكتى
وف غفوتى
عديت جسور الذكريات
عديت على كل اللى فات
فتشت ف أصول الحاجات
وكتبت بحروف اللغات
كل اللغات
إنك حبيبه وخنتها
إن اللى كان بينا انتهى
مع إن حبى بيبتدى ينـّبت غناوى
أنا كنت ناوى
أمد شريانى بوريدِك
أو أرمى قلبى فى حضن إيدِك
وأدوب كشمعه فى شمس عيدِك
وأكون فى مملكتك أمير
أنا كنت ناوى
أسقيكى إحساسى وحروفى
وكنت ناوى
أحميكى من فقرى وظروفى
وأدارى على أمنك بخوفى
وساعتها مش ممكن تهونى
دا لأن حبك جوه قلبى
سر من أسرار جنونى
والفرق بين إنى أكون
وانتى تكونى
هيموت على صدر الملل
من غير زعل
أنا كنت ناوى أرفعك
فوق القصيده والقلم
وأرميكى فرحه فى كوم ألم
يمكن ترافقينى وانا
بافتح طربق
لبحور ما تعرفيش الغرق
ولموج ما يرميش الغريق
لعيون برئ
ولإن إحساسى بحبك
فى الزمن ده شئ قليل
إستنى يمكن يجى يوم
أرجع معايا المستحيل :
الحب
والخل الوفى !!!